وكالات//

واحد العائلة إيرلندية خدت مؤخرا تعويض قيمتو 100 ألف دولار أمريكي، بعدما واحد الروسطورة فـ النكليز اتّهمها بالزور بأنها خرجات من المطعم وما خلصاتش الفاتورة.

التفاصيل ديال الواقعة كانت فشهر يوليوز 2023، منين مشى بيتر ومراتو آن مغير وولادهم بجوج، بيتر جونيور وكارول، يتعشاو فمطعم The Horse & Jockey Inn فمنطقة بيك ديستريكت. طلبو شرائح ديال لحم ريب ومشروبات، وخلصو الفاتورة اللي كانت 150 جنيه إسترليني (حوالي 200 دولار) ببطاقة بنكية، ورجعو لدارهم فمدينة أوماغ.

لكن منين مشاو، الريسطو نشر فيديو من كاميرات المراقبة على صفحتو فـ”فيسبوك”، وادعى فيه أن العائلة مشات بلا ما تخلّص.

الفيديو دار البوز بسرعة، ولات العائلة فوسط ضجة إعلامية كبيرة واتهامات شوهات سمعتهم.

لكن من بعد، التحقيق بيّن أن العائلة كانت فعلاً خلصات، غير أن واحد من العمال نسى يسجّل العملية فالنظام ديال المطعم.