كود – كازا ///

قالت مواقع هولندية، إن عائلة المغربي حمزة (25 عام) اللي قتلو جارو الهولندي بسباب نقاش على الباركينگ كتطالب بالتحقيق ف الواقعة باعتبارها جريمة عنصرية، بالنظر إلى رسائل التحريض وخطابات الكراهية ضد الإسلام اللي نشرها المشتبه به قبل تنفيذ جريمتو فحق الضحية المغربي.

وتورط مواطن هولندي كيبلغ من العمر 55 عام وحالتو العقلية ماشي مستقرة (حسب صحيفة دي تليخراف)، مؤخرا، فجريمة قتل جارو المغربي اللي كيبلغ من العمر 25 عام. المتهم الهولندي قتل الضحية ديالو ف الليل بـ3 ديال القرطاسات.

وتوفي الضحية المغربي متأثرا بجراحه في الصبيطار. وحسب شهود عيان، وقعات الأحداث ليلة الأربعاء 10 يوليوز الحالي فمنطقة ستامبرزجات جنوبي هولندا، بالقرب من بلدة روزندال، على خلفية نقاش على الباركينگ وأماكن ركن الطوموبيلات داخل المجمع السكني.

وحسب الإفادات اللي خاذ البوليس، كان الضحية جاي فالليل وكيتكلم في التلفون بشكل عادي، وغير سالا المكالمة ديالو قرب منو جارو الهولندي وطلق عليه 3 ديال القرطاسات، ومن بعد مشا قاصد دار الضحية بالفردي، حيث كانت زوجة الضحية وبنتو مخبيين.