كود- كازا//

تحولت نهاية محاكمة ولد الشينوية وبنت عباس، البارح الاثنين فالليل بالمحكمة الابتدائية الزجرية بالدار البيضاء، إلى مسرح للاعتداء على الصحافيين والمصورين الصحافيين، اللي كانوا خدامين تما على تغطية أطوار المحاكمة، وتكرفسو عليهم شي وحدين من عائلات المتهمين.

وبعدما حكمت المحكمة على كل من ولد الشينوية بـ3 سنوات حبسا نافذا للسب والقذف والإخلال بالحياء العام والتشهير، وعلى بنت عباس بعامين ونص حبسا نافذا لتبادل السب والقذف والتشهير، وعلى أم ولد الشينوية و3 من خواتاتو بالحبس النافذ، خرجو عائلات المتهمين من المحكمة وبداو كايغوتو احتجاجا على الأحكام الصادرة في حق الأقارب ديالهم، ولكن بطريقة فوضوية ودارو الروينة.

وتهجمو العائلات ديال ولد الشينوية وبنت عباس على الصحافيين والمصورين اللي كانوا خدامين في تغطية أطوار المحاكمة باش ينقلو أخبارها للرأي العام الوطني، وتم الاعتداء على الصحافيين جسديا ولفظيا بالليل قدام محكمة عين السبع بالدار البيضاء، من طرف شي وحدين من ولاد عباس اللي واحد فيهم هز حجرة وهدّد بضرب الصحافيين، مستغلين عدم تواجد الأمن والسلطات فهاديك اللحظة بعين المكان.

وبحال هذه التصرفات وتاهرگاويت من شأنها التشجيع على الفوضى قدام المحاكم، إذا لم يتم ردع المقترفين ديالها واذا ما تحاسبوش هادو اللي بغاو يتعداو على الصحافيين قدام المحكمة بالدار البيضاء وخداو الجزاء ديالهم، وغايوليو الصحافيين يخافو يمشيو يخدمو فواحد المرفق عمومي اللي المفروض فيه الأمن والأمان بحال المحكمة، باش ينقلو للرأي العام أطوار وأخبار جلسات المحاكمات في مختلف القضايا.

https://web.facebook.com/watch/?mibextid=WC7FNe&v=2879314035564943&rdid=LI2vFx1RHrDPXrlE