كود الرباط//

الفيديو لي دار عبد الإله مول الحوث د مراكش فاش قال قبل ايام بلي كيبيع السردين ب 10 دريال للفقراء والمساكين، نوض صداع بين الحواتا للي تشكاو منو واتهموه بلي ضرب ليهم المنافسة وتسبب ليهم فمشاكل مع الزبناء.

المعروف قانونيا بلي التهراس ديال السوق وطيح الثمن، ممنوع قانونيا، وكاينا اسئلة كذلك حول تدخل مجلس المنافسة فهاد الموضوع.
وفهاد السياق، قال أحمد رحو، رئيس مجلس المنافسة في تصريح لـ”كود”، بأن “القانون صريح وواضح وهو أن البيع بالخسارة ممنوع إذا كان عنده تأثير مهم بالنسبة للمنافسين، وليس في كل الحالات”.

وأوضح رحو لـ”كود” :”لكن للي مسموح به البيع بالخسارة، هو في حالة وجود سطوك بقا ليك وبغيتو تفك منو وبغيتي تبيعو واخا بالخسارة.. ولا فحالة كادير الصواد هو البيع بالخسارة لأن الموضة تبدلت ولا شاطت ليك السلعة هنا مسموح فيه”.

وأضاف رحو لـ”كود” :”ولكن إذا كان البيع بالخسارة عندو تأثير على المنافسين فهو غير مسموح، وهنا كيكون ف حالات معينة، منها اذا كانت كميات البيع هائلة جدا كتأثر على السوق، ولا كتبيع مدة طويلة بالخسارة، والا كان الهدف تقصي منافس من السوق”. فهاد الحالات فقط يكون البيع بالخسارة ممنوع.

فحالة عبد الاله المراكشي لي دار فيديو كيبيع فيه سردين ب 10 دريال، قال رحول :”خاص نشوفو المنافسين واش عندهم ضرر”، مضيفا :”من ناحية الاعلام لا نتدخل، واش باع كميات كبيرة واثر ف السوق، هنا كاين غير اخبار يمكن غير قانونية. هو من باب الاعلام الخاطئ. ماشي من باب المنافسة”.
وتابع رحو لـ”كود” :”التباهي ببيع كمية معينة بثمن معين، هناك كيكون دور القضاء في الحسم فيه اذا كانت شكايات، لحد الان مكاينش تأثير وباقي سوق الجملة هو هو.. كيبدا بثمن ويسالي بثمن”.