كودـ شيشاوة//
قالت مصادر مطلعة لـ(كود) إن قاضي التحقيق ف المحكمة الابتدائية بإيمنتانوت، بإقليم شيشاوة، قرر نهار الجمعة 2 يناير 2026، إيداع رئيس جماعة “انفيفة” الحبس الاحتياطي بالسجن المحلي لوداية، مع تحديد نهار الخميس الجاي كموعد لبدء جلسات التحقيق التفصيلي فهاد الملف.
وحسب المعطيات ديال “كود”، فالمعني بالأمر داز قدام النيابة العامة من بعد ما تمددات ليه مدة الحراسة النظرية، بعد ما سمع ليه واحد من نواب وكيلة الملك، قبل ما يتدار ملتمس رسمي لإحالة الملف على قاضي التحقيق وفتح تحقيق فالأفعال المنسوبة ليه.
القضية تفجرات من بعد ما توقف رئيس جماعة انفيفة، مساء الثلاثاء 30 دجنبر 2025، على خلفية الاشتباه فتورطو فتلقي رشوة مالية كتقدر بـ10 آلاف درهم.
مصادر متابعة هاد الملف أكدات أن المشتبه فيه، اللي كا ينتمي لحزب الأصالة والمعاصرة وكا يخدم حتى موظف فجماعة أخرى، تشد بمدينة مراكش من طرف عناصر الفرقة الجهوية للدرك الملكي، فكمين أمني تدار بتنسيق مع الجهات المختصة.
وقالت نفس المصادر إن عملية التوقيف جات بناء على شكاية تقدم بها واحد المواطن لرئاسة النيابة العامة عبر الرقم الأخضر، وقال فيها بأنه تعرض لطلب مبلغ مالي مقابل تمكينو من رخصة الربط بشبكتي الماء والكهرباء.
ومن بعد التوقيف، تحط المشتبه فيه تحت تدابير البحث القضائي بإشراف من النيابة العامة المختصة، بهدف تعميق التحقيق وكشف جميع ظروف وملابسات هاد القضية، فانتظار شنو غادي تسفر عليه المسطرة القانونية الجارية.
