وكالات//

وقعات حادثة خايبة بزاف فمدينة بلايدنسبرغ بولاية ماريلاندفميريكان، منين دخلات طوموبيل وسط حفلة عيد ميلاد ديال دراري صغار فحيّ سكني، وتسبّبات فإصابة 11 شخص على الأقل، منهم دراري عمرهم ما بين عامين وتسع سنين، قبل ما يهرب الشيفور من بلاصة الحادث.

البوليس ديال بلايدنسبرغ قالو فبلاغ باللي الطوموبيل زاغت على الطريق فـ”أنابوليس رود” وطاحت فـ مجموعة ديال الناس اللي كانو مجموعين قدّام دار كيحتافلو بعيد ميلاد طفل، ومن بعد الشيفور خلا الطوموبيل وهرب على رجليه. السلطات سَدّات الطرقان اللي حدا البلاصة باش يسَهلو عملية الفحص وتنقية الآثار ديال الحادث.

البوليس أكدو أن جميع الجرحى تدارو فالسبيطارات القريبة، وكاينين جوج حالات خطيرة.

وأضافات الإدارة باللي بين المصابين جوج عيالات، و4 دراري و3 بنات، ومعظمهم عندهم جروح خفيفة ما كتشكّلش خطر على حياتهم. البوليس ديال المقاطعة باقي كيقلب وكيحقق باش يعرف شكون هو الشيفور وشنو بالضبط اللي خلاه يدير هاد الشي.