وكالات//

طاح واحد الطواليط متنقل من فوق قنطرة “بونطي ديل سينتيناريو” للطريق المدارية SE-30 اللي عامرة فمدينة إشبيليا الصبلونية.

هاد الحادثة خلات الحطام ديال الطواليط كيتطاير بين المسالك ديال الطريق، ولكن ما تصدمات حتى شي طوموبيل مباشرة وما كان حتى شي مصاب.

ووقع الحادث مع الخامسة والنصف دالعشية، فاش كانو خدامين فواحد الأشغال كبار ديال الترميم فالقنطرة المعلقة، وكانو كيرفعو داك الكابينة. وفيديوهات تدارو فالسوشيال ميديا باين فيهم الطواليط كيسقط من نص القنطرة وكيهبّط فالمسلك الوسطاني ديال الطريق اللي كيدوز منو تقريبا 90 ألف طوموبيل كل نهار.

الحادث عطل السير شوية حتى جاو فرق الطوارئ وحيدو داك الحطام كامل.

والمعروف أن مشروع التطوير ديال القنطرة، اللي كيساوي 137 مليون أورو والمسند لشركة “أكسيونا”، كيتضمن تغيير 88 كابل ديال التثبيت وتوسيع المسارب من خمسة لستة فكل اتجاه. وهاد المشروع سبق ليه تعرّض لانتقادات حيث كاين اللي كيقول فيه شبهات ديال الفساد مرتبطة بمسؤول حزبي سابق.

ومصادر مطلعة قالت بأن إدارة القنطرة والشركة المكلفة فتحو تحقيقات فالحين لجمع التقارير من جميع الأطراف وتحديد شكون المسؤول، خصوصاً فالبروتوكولات ديال السلامة المتعلقة بالرفع الجوي.