كود طنجة//

عاشت ساكنة “حي المرس” بمدينة طنجة، فالساعات اللولة من صباح اليوم، على وقع فاجعة مؤثرة، بعدما تم العثور على شابة فمقتبل العمر ميتة داخل منزل أسرتها، فحادث كيرجحو المعطيات الأولية يكون سبابو وضع حد لحياتها، مع بقاء الأسباب الحقيقية مجهولة لحد الساعة.

وحسب المعلومات اللي توصلات بها “كود”، فالشابة تلقات داخل المسكن، وكيبان أنها كانت ملفوفة العنق بحبل، الأمر اللي خلا العائلة تشعر بالصدمة وتخبر السلطات المختصة، اللي حلت بعين المكان ودارت المعاينة اللازمة وفتحات محضر فالنازلة.

وبتعليمات من النيابة العامة المختصة، تم نقل جثمان الهالكة لمستودع الأموات باش يخضع للتشريح الطبي، بهدف تحديد السبب الحقيقي للوفاة وكشف جميع الملابسات المحيطة بهاد الحادث المأساوي، فيما مازال البحث متواصل تحت إشراف الجهات المختصة.