كود سبور ///
ادارة الوداد البيضاوي طالع ليها الدم من سفير المغرب في مصر احمد التازي. هاد السفير ما تسوقش للنادي ما عقلش على اللعابة اللي عندهم الاحد ماتش روتور ديال نهاية عصبة الابطال الافريقية ضد نادي الاهلي المصري.
ووفق مصدر ل”كود” فادارة النادي ما فهماتش هاد التصرف وعليه ما بغات تكون عندها حتى شي اتصال بالسفير.
“كود” قلبات على شي سبب مقنع يخلي سفير صاحب الجلالة فارض الكنانة٬ ما لقاتوش. كنهدر على سبب عندو ساس.
“كود” سولات على التازي اللي كان مدير الشؤون العربية بوزارة الخارجية٬ كلشي كيهدر على صفة فهاد الانسان ماشي السفير٬ وهو انو جلدة. صقرام. شحيح. بخيل وبزاف.
الناس فالقاهرة وخاصة وسط الاعلاميين والفنانين المصريين كيترحمو على السفارة ايام محمد فرج الدكالي وعبد اللطيف ملين. كيترحمو ايام كانت دار المغرب عامرة كتستقبل نخبة عاصمة المحروسة القاهرة. كتكرمهم. كتعطي صورة على لبلاد.
اللي وقع مع الواك خاص تاخدو الخارجية بعين الاعتبار. خاصها تولي تختار سفراء صاحب الجلالة٬ بالاضافة الى تمكنهم من العمل الديبلوماسي٬ خصلة الكرم. خاصهم يكونو كوراما. هادوك السفرا الجلدات راهم ما صالحينش واخا يكونو فيدهم. بلاد الكرم خاصها سفرا كيعكسو هاد الصورة
