كود سبور//
قرر المكتب المديري للوداد الرياضي تعيين مدرب مساعد مغربي فالطاقم التقني للجنوب إفريقي رولاني موكوينا مدرب الفريق الأحمر، باش يعاونو خلال المرحلة المقبلة، واللي خاص يحقق فيها الفريق نتائج إيجابية وإلا فمستقبل موكوينا مهدد بالإقالة، حيث ما يقدرش مازال المكتب المديري للنادي يصبر عليه كثر بعد النتائج السلبية الماضية، واخا كانوا متشبثين.
وكشف محمد طلال الناطق الرسمي للوداد الرياضي في تصريح لجورنال “گود”، وقال: “تقرر تعيين مساعد للمدرب خلال الأسبوع المقبل وغايكون مغربي ويجيد الإنجليزية باش يعاون المدرب موكوينا”.
وبخصوص مستقبل موكوينا، قال محمد طلال: “المكتب المسير والرئيس تشبثوا بالمدرب بالرغم من النتائج السلبية اللي تحققت ولكن كاين بوتيت كونديسيون ديال المباريات اللي ما يقدرش المكتب المسير للوداد يصبر عليهم كثر ونتمناو تكون انطلاقة الوداد ابتداء من الماتش ديال تطوان”.