عمر المزين – كود//
كتعاود “كود” تنشر معطيات خطيرة ومثيرة على الطبيب النفسي المعروف بـ”سعد”، اللي تحكم عليه الاثنين للي فات بـ20 سنة حبس نافذ، بعدما تورط فاعتداءات جنسية على مريضات نفسيات، وكان كيسيطر عليهم داخل العيادة ديالو ومنزلو ورياض معروف ففاس.
طالبة فكلية الطب والصيدلة، وللي كتعتبر من أبرز الضحايا ديالو، كشفت تفاصيل خطيرة على الحصص “العلاجية” اللي كانت كتدوز عندو. هاد الطالبة، اللي من إقليم صفرو، قالت إنها كانت كتمشي لعيادتو فالليل وكتسنى الدور ديالها، ومنين سالاو الناس كاملين دخلها عندو، ولقات معاه ولد عمو وأستاذ ديال الموسيقى.
حسب تصريحها للفرقة الجهوية للشرطة القضائية، الموسيقي كان كيعزف شي مقطوعات موسيقية، والطبيب كان كيهضر معاها حوالي 15 دقيقة، ومن بعد طلب من الموسيقي يخرج وبقاو بوحدهم. طفا الضو وشعل غير لامبة خافتة، وحط البخور، وقال ليها بلي هاد الشي داخل فالعلاج. من بعد بدا كيحكي ليها على حياتو، وبعد حوالي جوج ساعات جاب قرعة ديال الشراب وطلب منها تشاركو فيه.
الطالبة قالت بلي الطبيب بدا كيعبّر ليها على إعجابو بيها، وقرب منها وبدا كيحضنها ويبوسها فالليل، وعطاها موعد آخر لحصة جديدة.
من بعد مشى عندها لمدينة صفرو بسيارتو وطلب يشوفها، وسلم ليها جرعة من مخدر الكوكايين وطلب منها تستهلكو معاه. هي فالأول رفضات حيث ماشي مدمنة، ولكن هو بقا كيضغط عليها حتى وافقات، ووقع بيناتهم اتصال جنسي بلا استعمال واقي.
ضحية أخرى، كتسمى “د.ش”، قالت بلي الطبيب استغلها بحجة أنه غادي يعلمها موسيقى كناوة بآلة “الكنبري”، وعرض عليها تخدم معاه فالعيادة باش تدخل الموسيقى فالعلاج. وافقات وخدمات معاه حصة وحدة وخداّت 1300 درهم.
من بعد شغلها ثلاثة أيام فالاستقبال، ولكن حيدات حيث ما عجبهاش الوضع. قالت بلي كان كيصرح ليها بإعجابو عبر رسائل واتساب، ووجه ليها إيحاءات جنسية، وتحرش بيها فالمكتب ديالو، وكان كيوهمها بلي غادي يشغلها معاه فالحصص العلاجية. حتى أنه مرة خداها معاه لدار باش يبقاو بوحدهم.
وبخصوص إدخال الموسيقى فهاد “العلاج الوهمي”، استمعت الشرطة حتى لموسيقي صديق للطبيب، كان قرا معاه فالثانوية، وسبق ليه تعالج عندو من الوسواس القهري لمدة عام ونص. الطبيب عرض عليه يخدم معاه فحصص التنويم المغناطيسي بالموسيقى، سواء بالبيانو ولا الغيتار، مقابل 400 درهم للحصة.
الموسيقي قال بلي شداتو الشكوك حيث الطبيب كان كيستقبل المرضى غير فالليل وكيبقى حتى لساعات متأخرة، وهاد الشي خلاه يستغرب السبب الحقيقي وراء هاد المواعيد المتأخرة.