الرئيسية > آراء > طفلة العرايش تعذبات جوج مرات المرة اللولة من طرف أمها والمرة التانية من طرف الإعلام وباها.. شانقين عليها وجايبينها قبالة الكاميرة تبكي ويزيد يتعزز عندها الشعور ديال أنها هي السبب في العصا والتعذيب لي كلات وهي السبب عاوتاني فأن مها تشدات
29/11/2020 17:00 آراء

طفلة العرايش تعذبات جوج مرات المرة اللولة من طرف أمها والمرة التانية من طرف الإعلام وباها.. شانقين عليها وجايبينها قبالة الكاميرة تبكي ويزيد يتعزز عندها الشعور ديال أنها هي السبب في العصا والتعذيب لي كلات وهي السبب عاوتاني فأن مها تشدات

طفلة العرايش تعذبات جوج مرات المرة اللولة من طرف أمها والمرة التانية من طرف الإعلام وباها.. شانقين عليها وجايبينها قبالة الكاميرة تبكي ويزيد يتعزز عندها الشعور ديال أنها هي السبب في العصا والتعذيب لي كلات وهي السبب عاوتاني فأن مها تشدات

محمد سقراط-كود///

أغلب المغاربة شاف الفيديو البشع ديال الطفلة لي عذباتها الأم ديالها في العرايش، وطبعا بزاف شافو أيضا فيديوات الأب ديال الطفلة الذي لا يقل غجراما بالنسبة ليا من الأم، لأنه في جميع الفيديوات لي دار مكاين حتى شي إدانة لسلوك الأم وإعتذار للطفلة أو يحس على الأقل بأن داكشي لي وقع راه جريمة في حق هاديك البنت مسكينة، سواء كواتها بصح أو بلعان يراه غير داك الرعب لي عاشت وداك البكا والضرب والتصرفيق راه خاصو عقوبة وتقويم، ولكن للأسف بحال لي كيديرو كاع المغاربة ديما كيبررو الإعتداء ويدينو الضحية ويردوها هي لي تسببات في داكشي لراسها، الأب كيقول أن البنت مابغاتش تحيد داك العادة ولصقاتها في ختها حسب زعمه ولكن واش بداك التعذيب الهمجي غادي يتم تقويم سلوك هاد البنت.

للأسف حتى واحد من أسرة الطفلة مابين الدعم ديالو للطفلة المعنفة فقط راها واكلة شاربة اذن راها بيخير، بل العكس كاين نوع من لوم الطفلة في أنها هي السبب باش ماماها تشدات وناض هاد الصداع كامل، وعوض يناقشو الحادث غير بيناتهم ويعتارفو أن داكشي لي وقع راه تعذيب وحشي لطفلة صغيرة من طرف الأم ديالها، هوما ناضو كيهدرو على بحال شي مؤامرة كونية من أجل تشويه صورة كريط فالعرايش والأسرة ديالو، وأن الأمر غير زادو فيه وتضخم وداكشي راه كان غير تهديد بالكي ماشي حقيقي، وأن الدرية مافيها والو صحيحة فصيحة وحتى هي بغات مها، راه طبعا تبغي مها راها طفلة، واخا كابرة في بالعصى، حيت مستحيل أن ديك الأم تكون مرة طيبة وحنينة على ولادها ومكتضربهمش حتى لداك النهار وبلا سابقة ناضت دارت فداك البنت ديك الحالة حدا عائلتها وهوما كيتفرجوا، راه غير داك الهدوء ديال الأب والطفل لاخر كيصور يعطيك الخبار على أن بحال داك عملية التعذيب راه عادية فديك الدار ومولفين بيها.

في العادة ديما كيتم لوم الضحية، بنت تغتاصبات أول ماغادي تسمع علاش دازت من تم علاش مشات معاه آش كانت كتدير فداك الساعة فديك البلاصة، غتاصبها خوها أو الأب ديالها، غادي تسمع وهي كانت كتدور حداه غير بكولون، مابقاش الإحترام دابا، هاعلاش قال الرسول فرقو بينهم في المضاجع، أطفال كياكلو لعصا من طرف أحد الابوين ديما غادي يتلامو البراهش، هوما قباح مابغاوش يسمعو مابغاوش ينعسو، لعصا خارجة من الجنة لي ماكلاها مايتهنى، واعمرك تشوف الناس هنا متعاطفين مع الضحية ويسولوها على الأثر النفسي ديال داكشي عليها، أو يحاولو يعطيوها الحب والإهتمام لي خاص باش تحسن حالتها، ديما الضحية هي السبب، وهادشي لي وقع لطفلة العرايش مسكينة مكاينش نهائيا هدرة زوينة للبنت أو دعم نفسين بل فقط حصص تعذيب نفسي أخرى وشانقين عليها وجايبينها قبالة الكاميرة تبكي ويزيد يتعزز عندها الشعور ديال أنها هي السبب في العصا والتعذيب لي كلات، وهي السبب عاوتاني فأن مها تشدات.

موضوعات أخرى

18/01/2021 22:53

وتعطلنا واستثنينا بريطانيا. ممنوع طيارات ومسافرين يدخلو جايين من استراليا والبرازيل وايرلندا ونيوزللندا يدخلو للمغرب

18/01/2021 22:30

الخبرة الجنية لإثبات نسب البنيتة نور من المحامي الطاهري.. المحامية الكَلاف لـ”كود”: المحكمة اقتنعات بالإثباتات اللي قدمنا ليها.. وللطفلة كل الحق فالحصول على النسب