كود -وكالات//

فالوقت لي  أغلب الناس كيدوزو تقريباً ثلث حياتهم فالنعاس باش يرتاحو، كاينين شي ناس قلال بزاف ( 1%) عندهم طفرة جينية بحال DEC2 ولا ADRB1، لي كتخليهم ينعسو غير 4 سوايع فالليل، ويفيقو من بعدها بنشاط وتركيز عادي بحال إلا نعسو 8 السوايع ولا كتر.

واللي كيزيد يدهشر هو أن هاد الناس ما كيعانيوش من الآثار الجانبية المعروفة ديال قلة النعاس، بحال ضعف التركيز، نقص المناعة ولا تقلب المزاج لي كيوقع للي مكينعسش مزيان ،بالعكس كاينين دراسات كتشير أنهم عندهم طاقة أكثر من المعدل العادي، وعندهم قدرة أكبر على التفاؤل والتحمل النفسي، بحالا الطبيعة عطاتهم ساعات زايدة فالنهار بلا ما يخلصو الثمن ديالها.

واللي ملاحظ هو أن هاد الطفرة ماشي حاجة يقدر الواحد يكتاسبها بالتدريب ولا بتغيير العادات، حيث راه وراثية وكتدوز من جيل لجيل وسط نفس العائلة ،حتى أن بعض العلماء لقاو عائلات كاملة كتشترك فهاد النمط د النعاس ولي بريوسهم كيظنو فالأول أن قلة النعاس ديالهم غير عادة ماشي كادو  مكتوب فالجينات ديالهم.