كود – كازا ///

قالت جريدة بيريوديكو دي إيبيزا، إن الشرطة المحلية ف بالما شدات، مؤخرا، شابين يبلغان من العمر 21 و23 عامًا بعد سرقة طروتينيط إلكتريك ساوية 5000 أورو ف منطقة بارك دي لا مار.

وحسب الصحيفة الإسبانية، وقعات هاذ السرقة نهار الاثنين الفايت، وقال الضحية ف بلاغ للبوليس، أنه كان كيلعب مع ولدو ف الجردة وخلا الطروتينيط ديالو بعيدة عليه، وشاف المتهمين كيحومو حداها وغير غفل شوية قضاو الغرض.

وتحركت دورية للشرطة المحلية ف المنطقة وتمكنات من رصد الطروتينيط غير بعيد عن المكان اللي تسرقات منو، وبفضل تعاون مواطنين إسبان، تمكنو البوليس من اعتقال المتهمين اللي كانو مخبيين حدا شي بركاصة. واحد منهم مابغاش يعلن عن الجنسية ديالو وطلب حضور مترجم كيهضر بالدارجة المغربية، أما الشاب الثاني جبد للبوليس الباسبور الجزائري ديالو..