كود -كازا //

فالجزاير تطرّد أستاذ فالتعليم المتوسط قادري رابح من الخدمة ديالو فولاية المدية، بسباب التعبير على الرأي ديالو وانتقادو للميزانية لي كتخصصها الدولة الجزائرية لجبهة البوليساريو، هاد القرار خلق غضب وسط عدد من المتابعين فالجزائر، حيت السبب الحقيقي ماشي مهني ولكن سياسي على ما كيبان.

الأستاذ كان كيخدم فمتوسطة رزيق الأخضر فسيدي زهار، وكان معروف باحترام القوانين ديال الوظيفة العمومية والنظام الداخلي ديال المؤسسة، وخا هاد الشي كامل، توقف من الخدمة وبقى مدة طويلة بعيد عليها وسط سلسلة ديال المضايقات والإجراءات الإدارية، قبل ما يتبلغ رسمياً بقرار الطرد النهائي.

الأستاذ كان معروف بنشر فديوات على حسابو فلفيسبوك كينتقد فيها تمويل البوليساريو لي كيبقى موضوع حساس فالجزاير، خصوصاً وأن الملايير كتمشي لهاد الجبهة فحين الشعب الجزائري كيعاني مع الغلاء، والبطالة، وتدهور القدرة الشرائية، بزاف ديال الجزائريين كيشوفو أن هاد الأموال كان الأولى تمشي للتعليم، الصحة، والبنية التحتية عوض صرفها فصراعات إقليمية وتمويل جبهة معادية للمغرب بملايير الدولارات.

طرد أستاذ بسبب رأي سياسي كيبيّن شحال ديال التضييق على حرية التعبير كاين وسط المؤسسات، كيف ما كيعطي القرار انطباع على كيفاش يمكن يتعاقب أي صوت ينتقد طريقة صرف المال العام او انتقاد جبهة البوليساريو فدزاير، الشي لي ممكن يخلي هاد الأصوات تخسر خدمتها او حتى تمشي الحبس فدولة كتسمي راسها الجمهورية الديمقراطية الشعبية الجزائرية.