وكالات//

صورة ديال واحد الطبيب نفسي نشرها فصفحتو باش يعلن على افتتاح العيادة ديالو، دارت ضجة كبيرة فمصر، بحيث وصلات التعليقات لأكثر من 27 ألف تعليق.

ومعظمهم من نِساء عبّرو على الإعجاب ديالهم بالمظهر ديال الطبيب، وهاد الشي اعتبروه بزاف ديال الناس فالسوشل ميديا تجاوز للحدود الاجتماعية والأخلاقية.

وقالت تقارير صحفية إن هاد الكومونطيرات أثّرت بزاف على العلاقات الزوجية، ووصلات فبعض الحالات حتى للطلاق، بحيث تسجلو 78 حالة عندها علاقة بردود فعل ديال النساء على الصورة المنشورة.

هاد الواقعة خلّات الناس يطرحو أسئلة على تأثير مواقع التواصل الاجتماعي على الحياة الزوجية، وشنو هي الحدود لي خاص تكون فالتعامل فالإنترنت.

ومن بين أبرز هاد الحالات، كان واحد التعليق كتبّاتو سيدة متزوجة، قالت فيه: “واش هاد العسل؟.. عينيك دوّخوني والله.”

التعليق تشهر بسرعة فالسوشل ميديا، قبل ما بعض الناس يسيفطوه لراجلها.

وبعد غير ساعات قليلة، خرج الزوج فواحد المنشور قصير وعلن بأنه طلّق مراتو، واكتفى بالقول:

“قدر الله وما شاء فعل”، فإشارة واضحة بأن داك التعليق كان هو السبب المباشر فطلاقهم.

هاد الواقعة حرّكات نقاش كبير على فين كيوقف حدّ المزاح فمواقع التواصل، وكيفاش خاص المتزوجين يحترمو خصوصية العلاقة ديالهم، وزيد عليها دور المتابعين لي كيأججّو المواقف وكيصيفطو التعليقات للأزواج.