كود سعاد زرار ///

تعيينات الحكماء الجدد فالهيأة العليا للسمعي البصري فيه مفاجئات وما زويناش. التعيينات للي خرجات بعد ما تنشرات فالجريدة الرسمية فيها محمد لعروسي =معينو رئيس الحكومة= فبلاصة خليل العلمي الادريسي وعادل عبد اللطيف =معينو رئيس مجلس النواب= فبلاصة بديعة الراضي وعادل بنحمزة =معينو رئيس مجلس المستشارين= فبلاصة محمد المعزوز.

نشوفو شكون هاد 4 اللي تعينو فمجلس فيه 9 حكماء. اي 4 جداد و5 بقاو فبلاصتهم: الرئيسة لطيفة اخرباش ونرجس الرغاي وجعفر الكنسوسي وعلي البقالي وفاطمة البارودي. 

نبداو بتعيين رئيس الدولة. الملك عين محامي كيخدم فكابيني الناصري اسمو ياسر غربال فبلاصة الكاتب والديبلوماسي المعروف عبد القادر الشاوي. هادا محامي من مواليد 1973 تسجل فالمهنة ف2008 وادى القسم ف2005 ما معروفش فبلادنا. كيدافع علي قضايا فيها البيزنس وصافي. ماشي كالبير كبير.

ماشي شي حد كيدافع علي الحريات والحقوق. ما عمرو خدا شي موقف علني. ماشي فمستوى حكيم اخر كان فهاد المنصب اللي هو الراحل محمد الناصري. كان داز فاول هيأءة تكونات قبل ما يولي من بعد وزير للعدل. يعني نكرة وصافي. وما عندوش شي علاقة بالقطاع. ماشي فحجم لا الرئيسة اخرباش ولا الصحافية نرجس الرغاي ولا الناشر الكاتب جعفر الكنسوسي ولا علي البقالي اللي كان ف”الصاب” ديال الاشهار وعندو تجربة مهنية تسمح ليه يدخل لحكماء الهاكا.

لكن كاين تعيين اغرب لحكيم. عينو رئيس الحكومة عزيز اخنوش واللي هو محمد لعروسي.

هادا اصلا ما عارفش راسو اش كيدير. مرة كيدير الاشهار وعندو شركة. مرة كيدعي الكتابة وكيدور علي صحف وجرائد باش يكتب فيها حتى لقى شي صاحبو ودار شي موقع باش يبقى ينشر داك الشي اللي كيعتاقد انو مقالات رأي. لعروسي كيعرفوه صحاب السينما. طبال. كيطبل لمخرجين كيديرو افلام تافهة. كيطبل لمدراء دازو فالمركز السينمائي المغربي بحال صارم الفاسي الفهري. صعيب يستوعب اللي متبع السمعي البصري هاد التعيين

كيما صعيب يستوعب استمرار فاطمة البارودي اللي كانت مديرة اخبار ف”الاولى” لولاية جديدة. عينها العثماني وخلاها اخنوش. حتى هي مع الرابحة. ما عندهاش فكر نقدي. ما عندهاش شي حاجة خايبة. هي ديما “العام زين”.

بنت الباشا فاطمة المنصوري اللي كيسوگ التراكتور وكيعاونها مهدي بنسعيد وصلاح ابو الغالي٬ جابت باحث كيطبل ليها. البام خرج منها محمد المعزوز ودخل باسمها او بنفوذ المنصوري عادل عبد اللطيف.

استاذ فجامعة بمراكش كان دار كتاب على “الاقناع السياسي في الشعارات الانتخابية المغربية” وجاب زعماء الاحزاب ديال الاحرار والبي جي دي والاستقلال والحركة والاتحاد والتقدم والاشتراكية واليسار الموحد. حط صور زعماء هاد الاحزاب وزاد بطريقة مفروشة فالصورة ديال غلاف لكتاب بنت الباشا واخا ديك الوقت كان وهبي عبد اللطيف هو الامين العام.

طبعا تكافأ علي هاد الشي ومارس البام ضغوط باش يدخل للهاكا وكيعينو رئيس مجلس النواب التجمعي رشيد الطالبي العلمي. 

حزب الاستقلال وفي ل”المغرب لنا لا لغيرنا”. رئيس مجلس المستشارين النعم ميارة دار تعيين فيه محاباة لتيارات الحزب المتصارعة. جاب الصحافي عادل بنحمزة باش يزيد يتقوى تيار ولد الرشيد بين الاستقلاليين. طبعا كان ممكن النعم ميارة يجيب كفاءة عندها تجربة كبيرة فالقطاع وحزب علال فيه هاد الكفاءات. لكن السياسة ربحات الكفاءة. بنحمزة كان دخل “لانابيك” ايام عباس الفاسي كان وزير للشغل وخرجات فضيحة “النجاة”. دخل للبرلمان بالريع عبر لائحة الشباب ومللي سالات الولاية ف2016 ما رجعش للخدمة واستافد من قوة نقابة حزبو الاتحاد العام للشغالين بالمغرب. بقى حتى جاتو هاد القضية ديال حكيم ف”الهاكا”. كادو من ميارة بدعم من صاحبو الكيحل.

الجانب الايجابي فحكماء الهيأة العليا للاتصال السمعي البصري 9 اليوم هو كاينة رئيسة مزيانة: لطيفة اخرباش. كاين مدير عام للاتصال السمعي البصري خبير فالقطاع اللي هو بنعسيى عسلون. كاينة كفاءات اخرى عند باقي الحكماء. فالعموم كاينة كفاءات فالهاكا مزيانة واخا خاص شي وحدين يتبدلو بحال اللي كيقدم راسو كاتب عام وللي كينمم كثر ما كيخدم. كيقدم راسو مرسول جهة فالبلاد. هاداك سالى وقتو باش تتقوى الادارة اكثر