كود ـ طانطان//

دارت واحد الدعوى على فيسبوك، كتناشد المواطنين كاملين باش يعممو نداء التبليغ على واحد السيارة تسرقات فظروف كتطرح اكثر من علامة استفهام.

وحسب المعطيات اللي جات فالدعوى المنشورة، فالعملية وقعات ففجر اليوم الأحد 14 دجنبر الجاري، منين تعرضات سيارة من نوع ميرسيدس للسرقة من قدام السكن الوظيفي ديال الدرك الملكي، بالضبط قرب مسجد محمد السادس بحي الصحراء بمدينة طانطان.

الدعوى اللي لقات بزاف ديال التفاعل، طالبت أي واحد شاف السيارة، ولا كيعرف شي معلومة عليها، يتاصل بأقرب مخفر للشرطة ولا مركز ديال الدرك الملكي، باش يتعاون الجميع فإرجاع السيارة لأصحابها وتسريع البحث عليها.

ونفس النداء دعا كذلك المواطنين للبارطاج على أوسع نطاق، حيث أن تعميم المعلومة كيبقى واحد من أنجع الطرق باش توصل لأي خيط يفيد فالقضية، خصوصا وأن السرقة وقعات فمكان حساس وقريب من مؤسسات أمنية.

ويبقى الأمل معقود على يقظة المواطنين وتعاونهم، إلى جانب تدخل المصالح الأمنية، باش يتم فك لغز هاد السرقة فأقرب وقت ممكن.