كود -وكالات//

قال رضا بهلوي ولد محمد رضا بهلوي آخر شاه ديال إيران، الموت ديال المرشد الأعلى الإيراني علي خامنئي ’’حاجة مزيانة”، وقال عليه بأنه كان “طاغية وعطشان للدم فهاد العصر ديالنا‘‘.

رضا بهلوي كتب فموقع التواصل الاجتماعي ديالو: “بموتو، الجمهورية الإسلامية وصلات فعلياً للنهاية ديالها، وغادي تترمى قريباً فمزبلة التاريخ”، بهّلوي، اللي عايش فمريكان وكيحاول يبين راسو كزعيم بديل للنظام الإيراني، قال بأن أي محاولة باش يتعيّن خليفة لخامنئي “محكوم عليها بالفشل من البداية”، قبل مايتوجه للشعب الإيراني ويقول: “يمكن تكون هادي بداية الاحتفال الوطني الكبير ديالنا، ولكن ماشي هي النهاية‘‘.

وخا أن بهلوي قدر يجمع مئات الآلاف من المعارضين الإيرانيين فمظاهرات فدول مختلفة، كيبقا شخصية منوضة الصداع، حيت كاين لي كيشوفوه ماشي شخصية موحِّدة بقدر ما هو شخصية كتقسّم الآراء.

الدعم ديال النظام الملكي اللي طاح فإيران مازال موضوع حساس بزاف، وحتى جريمة كيعاقب عليها القانون وسط إيران، حيث بزاف ديال الإيرانيين شاركو فثورة شعبية باش يطيحو بحكم الشاه اللي كانو كيشوفوه دكتاتوري.

وخا هكاك، بقى رضا بهلوي هو أشهر وجه للمعارضة الإيرانية برا البلاد.