وكالات//

لقا فريق ديال البحث التطوعي باستعمال درون مائية حطام معدني فـقاع بحر مرمرة فإسطنبول، وكيعتقدو باللي راجع لطيارة ركاب طاحت عام 1975 وبقى مصير 42 راكب اللي كانو فيها مجهول حتى لدابا.

الطيارة المدنية كانت جاية من إزمير، وطاحت فالْبحر قبل ما توصل لمطار إسطنبول لسبب ما معروفش، وما لقاوش الصندوقين الأسودين ديالها، وبقات جثث الركاب فالبحر وما تانتشلاتش طوال هاد السنين.

ولكن اليوتيوبر التركي نديم كورو قاد فريق ديال البحث فالبحر حدا منطقة بيوك تشيكميجه فغرب إسطنبول، باش يستكشفو القاع فالمكان اللي كيظنو أن الطيارة طاحت فيه، مستعملين درون مائية كتقدر تغوص وتصوّر.

وخلال هاد المهمة، بان حطام معدني معوّج وباين مزيان فالدقيقة 11:25 من الفيديو اللي نشر كورو فحسابو على يوتيوب، وهاد الشي رجّع للواجهة قضية هاد الطيارة المنسية، اللي كان من بين ركابها أقارب ديال شي مشاهير فتركيا.

وكايعتقد كورو والفريق ديالو أن هاد الحطام راجع لطائرة ديال الخطوط الجوية التركية اللي طاحت مساء 30 يناير عام 1975 فجو معصّف، وكانت سميتها “بورصة” ومن طراز فوكر F28 هولندية الصنع.