الرئيسية > آراء > ضغط. علاش المغرب كيلعب مع السعودية والامارات. سحب سفراؤو ما سحبهم خرج من الحرب فاليمن ما خرجش مقلق على بن سلمان وبن زايد ما مقلقش
10/02/2019 11:15 آراء

ضغط. علاش المغرب كيلعب مع السعودية والامارات. سحب سفراؤو ما سحبهم خرج من الحرب فاليمن ما خرجش مقلق على بن سلمان وبن زايد ما مقلقش

ضغط. علاش المغرب كيلعب مع السعودية والامارات. سحب سفراؤو ما سحبهم خرج من الحرب فاليمن ما خرجش مقلق على بن سلمان وبن زايد ما مقلقش

كود احمد الطيب الرباط ////

خرجة غريبة من وزير الخارجية والتعاون ناصر بوريطة مع “سبوتنيك” الروسية. هادي معروفة وخبارها ماشي ديما صحيحة. خرجة ومنين من واشنطن. بوريطة اللي ما حلش فمو فهاد الازمة قال باللي هاديك قضية استدعاء سفيري المغرب في الرياض وابو ظبي ما منهاش. ماشي صحيحة.

المشكلة ان نفيها فالاعراف الديبلوماسية عندها معنى. رسالة للامارات وللسعودية باللي التقليقة كاينة والقطيعة ممكن تكون والكورة عندكم. هادي قراءة من قراءات مختلفة لهاد الخرجة.

الرباط مقلقة على الرياض وعلى ابو ظبي. مستعدة تخرج قواتها من اليمن. على هاد القبال تم تسريب خبر ماشي صحيح لوكالة امريكية اسوشييتد برس” وتم تكذيبها بعد ما داز الخبر ووصلات الرسالة.

كان الخبر الثاني يتعلق بسحب الرباط لسفيرها مصطفى المنصوري من الرياض. مع الوقت بان باللي هادا عندو علاقة بالحلقة اللي دارتها قناة “العربية” على البوليساريو بدون مناسبة. المهم كان احتجاج.

داز الوقت وجات وكالة روسية تنقل تصريح لبوريطة كيقول باللي ما كاين لا سحب سفير من الرياض ولا من ابو ظبي.

يعني لعبة دارتها الرباط. خلات الضغط يدار على الرياض وابو ظبي باش هما يتحركو. هما يرياجيو. المغرب كيتفرج. الرباط بغات قنوات اخرى للحوار فالرياض اما الامارات فالامور ماشي بالتعقيد اللي كاينة فالسعودية. حاكمها محمد بن زايد قرا مع الملك محمد السادس. العلاقة بيناتهم علاقة قوية بزاف بزاف. تقدر تتعثر مرة مرة ولكن حلها ماشي بيد السفير ولا غيرو. مع السعودية وهاد الامير الجديد محمد بن سلمان الامور مختالفة. السيد ميزاجي بزاف وكيلعب كبير بزاف. ما فيهش ثقة وما يمكنش تتعامل معاه.

المغرب حول النقاش من نقاش ديبلوماسي لنقاش اعلامي شعبي. هادا مفيد ليه. رافع ليه الحرج الديبلوماسي. طبعا هاد الشي ماشي بوريطة اللي كيقودو. ما يعرفش ليه. هو كيدير اللي كيقولو ليه. بوريطة غير من بعض التعيينات الاخيرة فالسفرا كيبان مستواه. العلاقات مع الامارات ومع السعودية ما كيكونش لوزير الخارجية يد فيها.

موضوعات أخرى