وكالات//

فواحد التحذير عاجل خرجات به السلطات الجابونية البارح الخميس، طلبو فيه من سكان جزيرة أكوسيكي اللي كاينة فالأرخبيل ديال توكارا فجنوب اليابان، يخرجو من ديورهم ويتّجهو لأماكن آمنة، من بعد ما ضرب زلزال قوي جديد المنطقة، فوسط سلسلة ديال الهزّات الأرضية اللي فات عددها الألف فهاد الجوج دالأسابيع اللي دازو.

وحسب ما نقلاتو وكالة “فرانس برس” على لسان واحد المسؤول محلي فالجماعة، طلبو من حوالي 89 شخص – اللي هوما عدد السكان كاملين فالجزيرة – أنهم يمشيو مباشرة لملعب المدرسة المحلية، اللي تعيّن كمركز مؤقّت للإيواء فإطار الإجراءات ديال الحماية من الكوارث.

وكان زلزال بقوة 5.5 درجات فمقياس ريختر ضرب المنطقة صباح الخميس، قريب بزاف من جزيرة أكوسيكي، بلا ما تسجّلات خسائر كبيرة لا فالأرواح ولا فالممتلكات، ولكن تواصل هاد الزلازل بشكل مستمر خلى السلطات والخبراء يخافو بزاف.

والمعروف أن أرخبيل توكارا، اللي فيه 12 جزيرة كاينين فجنوب منطقة كيوشو، كيعرف نشاط زلزالي متزايد فالفترة الأخيرة. وسبعة من هاد الجزر ما فيهمش السكان، فيما كيعيش فالباقي إلا حوالي 700 شخص.