كود -وكالات//

مني مشا لبرلين فألمانيا، رضا بهلوي نجل شاه إيران الراحل، تعرض لاعتداء بعدما ترش بكيتشوب وسط تجمع فيه مؤيدين ومعارضين، قبل ما يتدخل البوليس الألماني ويعتقل مول الفعلة، بهلوي كيدير جولة فعدد من الدول الأوروبية لي من بينها السويد وإيطاليا وألمانيا، حيث كيبغي يقدم راسو واحد من أشهر وجوه المعارضة الإيرانية فالمنفى.

بهلوي استغل المناسبة باش يوجه انتقادات للحكومات الأوروبية، مني اعتبر أنها كتساهل مع النظام الإيراني، وقاليهم بلي خاص يجريو على الدبلوماسيين الإيرانيين ويدعمو حرية الإنترنت وسط إيران، كما قال إن أي مفاوضات مع القيادة الحالية فطهران ما عندها نفع، لحقاش مناوياش التغيير.

فالمقابل هاد التصريحات ديالو دارت نقاش كبير ملي هضر على دعم شعبي ليه واسع فإيران، وهو الشي اللي كيشكّو فيه بزاف ديال المراقبين، حيت كاينة انقسامات وسط المعارضة الإيرانية لداخل وعلى برا.