سعيد الشاوي كود ////

مول لفروماج لملايري عبد الرحيم بن الضو الامين الجهوي لحزب الاصالة والمعاصرة زوج بنتو الصغيرة ول البارح السبت 30 ماي 2025 فدارو اللي كاينة فطريق مكة فكازا. بن الضو مع المشاكل اللي بدات كتبان عندو سواء سياسية مع حزبو اللي بدا يتخلى عليه او مع البيزنس ديالو بعد ما سبق للفرقة الوطنية دخلات فواحد الشحنة ديال لفروماج هادي اشهر، قلب على نسيب من المخزن اللي هو عبد اللطيف لوديي، الوزير المنتدب لدى رئيس الحكومة المكلف بإدارة الدفاع الوطني. 

بنت مول لفروماج تزوجات شي لوديي ماشي ولد عبد اللطيف حسب مصادر “كود”.

العرس خسر فيه سياسيا لان هاد البرلماني اللي ما عمرو دافع الا على البيزنس ديالو وما عمرو سول الحكومة على قضية ديال سكان ديك الدائرة فالبرلمان، لان لا بنت الباشا فاطمة الزهراء المنصوري منسقة القيادة الثلاثية للبام ولا بنسعيد المهدي عضو هاد القيادة، حضرو. الغريب انهم كانو بجوج ساعات بعد العرس فسلا فالمجلس الوطني للحزب اي 31 ماي 2025. العرس حضرو نزار بركة وزير التجهيز الامين العام لحزب الاستقلال. اللي عرض عليه هو لوديي ماشي مول لفروماج.

دابا هاد الشي كياكد اللي سبق ل”كود” نشراتو، ان هشام الصابري كاتب الدولة المكلف بالشغل لدى وزير الإدماج الاقتصادي والمقاولة الصغرى والشغل والكفاءات هو اللي كيدير خدمة بن الضو. مقاطعة المنصوري ومعاه القيادة لعرسو ضربة ليه.

لملايري دار عرس هرگاوي. فيه مقومات ملايرية اللي يالله دارو لفلوس وناقصهم الذوق. فالبلاطو ارتيستيك من اللي حياو عرس بنتو الفنان الشعبي عبد مغيث. 

وعرض على شي وحدين مضاربين مع سعيد الناصري واتهمهم فجلسة فمحاكمتو باللي لعبو دور باش يتابع فهاد القضية فحالة اعتقال، واخا هاد بن الضو اللي بدا حياتو مهرب للفروماج من باب سبتة لكازا، مدين بزاف لرئيس الوداد السابق.

من للي حضرو فعرسو عدد من صحابو فكازا. حضر ليه حتى حرمو ديال الجدارمية. طبعا جا بدعوة من لوديي وما دوزش مدة طويلة. دار الصواب ومشى
بن الضو واخا لملايير اللي عندو تناقش فهاد العرس مع عائلة لوديي. مواتيي مواتيي، حسب مصدر ل”كود”. 

دابا عدد من المدعويين ما حضروش، وفيهم وزراء ومسؤولين. واش هادو بسباب مشكلتو مع ابو الغالي بسباب ديك الارض. السيد عرض على كاع الوزرا وجاه غير نزار وغير حشم من لوديي