سامي العلوي -كود كازا //

وجهات الداخلية ضرب قوية لأقوى رجل فحزب الاستقلال بجهة كازا سطات، بعدما صدر عامل برشيد جمال خلوق اليوم الأربعاء، قرار كيقضي بتوقيف رئيس جماعة برشيد، طارق قديري البرلماني والقيادي البارز فحزب الاستقلال، إلى جانب 4 نواب للرئيس من ضمنهم الكاميلي عبد الرحيم وكيل لائحة التراكتور و3 مستشارين، طبقا لمادة 64 من القانون التنظيمي للجماعات الترابية.

هذا القرار ديال العامل جا بعدما حط ممثل الإدارة الترابية دعوة قضائية عند المحكمة الادارية بكازا تطلب منها تجريد هاذ المجموعة ولي العدد ديالها 8 بما فيها الرئيس والنواب ديالو بالإضافة إلى مستشارين جماعيين، وذلك بعدما ارتكبو أفعال مخالفة للقانون .

قرار العامل بناه على تقرير المفتشية العامة لإدارة الترابية لي جات البلدية او رصدات مجموعة من الاختلالات تخص ملفات التعمير والضريبة على الأراضي غير المبنية والصفقات العمومية والرخص التجارية.

هذا المسطرة لي سلكها عامل الإقليم في حق البرلماني القادري والنواب ديالو كتعني احتمال كبير يكونو ممنوعين من الانتخابات لي جاية.