كود احمد الطيب الرباط ///

علمت “كود” ان ليلى بنعلي وزيرة الانتقال الطاقي والتنمية المستدامة خبرات٬ المكتب السياسي لحزب الاصالة والمعاصرة فاجتماعو الشهير اللي خرجو فيه بيان تضامني معاها٬ خبراتهم باللي “جهات عليا” هي للي نصحاتها دير هاداك البيان الكارثي اللي خرجاتو

حسب اكثر من عضو فالمكتب السياسي للحزب ل”كود” فهاد الاخبار خلى تقريبا كلشي يضامنو معاها وصلات لشي عضو بغباء كبير قال ما معناه “كلنا ليلى بنعلي” وجبد نظرية المؤامرة.

دابا كيفاش حزب كولو صدق روايتها اللي كذباتها الصحف الاسترالية. علاش هاد الحزب اللي باغي يعطي للمغاربة الدروس واخا هو تابعاه “خطيئة الولادة”٬ وطالب بتخليق الحياة السياسية٬ ما قدرش يطبقها فحالة بنعلي

المشكلة فقضية ليلى بنعلي ماشي البوسة فباريس ولا لوطيل تماك بل العلاقة مع مليادرير خدا مارشيات فالهيدروجين الاخضر فالمغرب. اي كاينة شبهة تضارب المصالح.

بنت الباشا واللي معاها عارفين باللي فالعالم اللي كيطبق فيه “تخليق الحياة السياسية” كان على بنعلي يتقدم استقالتها وكانت النيابة العامة تفتح تحقيق فهاديك شبهة تضارب المصالح. واش فعلاقتها مع الملياردير عطاتو معطيات خاصة جدا على سوق الهيدروجين الاخضر وبيها قدر يوقع معاه المكتب الشريف للفوسفاط.

داك البيان الشوهة للبام اللي كيبرر فعلتها غادي يبقى وصمة من وصمات عار كثيرة لصقات فالتراكتور.

البيان كان قال باللي بنعلي تعرضات لما سماه حملات التشهير والضرب اللي تعرضات ليه ليلى بنعلي ووصفها بالحملات “المنظمة” اللي كتمس “مصالح بلادنا، والتشويش على مسارها التنموي والتطور الحيوي الذي تعيشه على جميع المستويات لاسيما في المجالات والأوراش الإستراتيجية”.

وباللي استهدافها “عمل مقصود في حق وزراء يدبرون قطاعات استراتيجية وحيوية، ومحاولة فاشلة لتنيهم عن القيام بكامل مسؤولياتهم في الإصلاح الحقيقي وفي مواجهة اللوبيات، لاسيما حين توجه سموم هذه الحملات اتجاه نساء مغربيات يتحلين بالكفاءة ويمتلكن إرادة إصلاح حقيقية داخل مجالات ظلت بعيدة عن التغيير بسبب الخوف من كلفة الإصلاح السياسية والنفسية”. وباللي الحزب “يجدد تضامنه المطلق مع بنعلي”

هادا ضرب لدولة الحق والقانون. حكمو وقررو فبلاصة القضاء بناء على بيان الوزيرة اللي فنداتو كلو الصحف الاسترالية. الملياردير الاسترالي اكد تصريحات مقربيه لهاد الصحف٬ بللي العلاقة بين الوزيرة وهو عندها عام. فهاد العام خدا المارشيات.

فهاد الشي كولو اش دارت بنعلي؟ قالت باللي جهات عليا اللي قالت ليها دير البيان. قمة الاستحمار لكلشي. استغلال هاد الجهات اللي ما بغاتش تسميها. دستور لبلاد واضح. ما فيهش “الجهات العليا”فيه غير الاختصاص