عمر المزين – كود //

وحدة لخفر السواحل تابعة للبحرية ‏الملكية دارت أمس الإثنين ضربة كبيرة بزاف ضد عصابات الاتجار الدولي فالمخدرات فسواحل الجديدة. هادشي كشفات عليه القيادة العامة للقوات المسلحة الملكية في بلاغ ليها.

هاد العملية اللي تدارت بدعم من طائرة للمراقبة البحرية مكنات من إجهاض عملية لتهريب المخدرات في عرض ساحل الجديدة، وجات بعد مطاردة فعرض البحر لعدد من فلوكات ديال الصيد التقليدي، تستخدم في عمليات التهريب غير المشروع، ومنعها من نقل حمولتها إلى 3 قوارب كانت في الانتظار في عرض البحر.

هاد العملية، حسب المصدر نفسه، مكنات من توقيف 6 أشخاص، 3 منهم من جنسية إسبانية، وحجز كمية كبيرة من مخدر الشيرا تقدر بأزيد من 12 طنا، وعناصر “لامارين” دات الموقوفين لميناء الجديدة قبل تسليمهم للجدارمية باش يكملو معاهم الإجراءات المعمول بها.