كود الرباط//

خلاصات مهمة خرج بها منتدى الحوار البرلماني جنوب-جنوب فدورته الثالثة اللي تسالات اليوم الثلاثاء فالرباط، والمنظمة من طرف مجلس المستشارين، بشراكة مع رابطة مجالس الشيوخ والشورى والمجالس المماثلة فإفريقيا والعالم العربي.

المشاركون من قادة سياسيين ومسؤولين، اللي جاو من بزاف ديال الدول فإفريقيا وآسيا وأمريكا اللاتينية والكراييب، شددو على أن الحوار بين برلمانات دول الجنوب، سواء كان ثنائي وللا بين جهات، هو مفتاح باش نواجهو التحديات الجديدة فالعلاقات الدولية، وباش نوحدو الجهود ونربحو الرهانات اللي كتزاد تعقيدا كل نهار.

البيان الختامي ديال المنتدى ما فوتش الفرصة باش يأكد على أن “احترام السيادة والوحدة الترابية للدول وعدم التدخل فالشؤون الداخلية ديالها” راه أساس السلم والاستقرار والتنمية المستدامة.

المشاركين ذكرو فالكلمة الختامية بالقيم والروابط الإنسانية والتاريخية اللي كتجمع بين شعوب الجنوب، وقالو إن هاد المنتدى عطى فرصة مهمة باش يفكرو كيفاش يعززو الاندماج الجهوي والتعاون، برؤية تضامنية واستراتيجية كتشوف بعيد.

ومن بين النقط اللي تذكرو، كاين تثمين كبير للمبادرة الأطلسية اللي كان أعلن عليها الملك محمد السادس، واللي كتهدف تفتح المجال أمام دول الساحل باش يوصلو للمحيط الأطلسي، وتأسيس إطار قوي كيخدم وحدة إفريقيا الأطلسية، ويقوي التكامل الجيو-اقتصادي بين دول الجنوب.

وختمو المشاركين بالإشادة بجميع المبادرات الناجحة فالميادين ديال الاندماج والتعاون الجهوي، سواء فإفريقيا ولا فالعالم العربي ولا فآسيا وأمريكا اللاتينية، وقالو أن الطريق واضح: تعاون، فرص استثمار، وتكامل حقيقي نحو مستقبل مزدهر ومستدام.