گود -وكالات//

الدماغ البشري فيه تقريباً 86 مليار خلية عصبية، مرتبطين بـ100 تريليون نقطة اتصال، وخدام بإشارات كيميائية وكهربائية كتبدل ديما، وبطاقة قليلة ما كتفوتش 20 واط وحتى شي pc فالتاريخ ما قرب لهد المستوى من الخدمة .

باش نرسمو خريطة كاملة لهاد الشبكة ديال الدماغ، التقديرات كاتقول بلي غادي يخص تقريباً 10 دالمليون عام بالتكنولوجيا ديال دابا، والميموار غادي يتطلب 2 مليون بيتابايت.

فـ2013، باحثين من اليابان وألمانيا استعملو واحد من أقوى الحواسيب فداك الوقت باش يحاكيو غير 1% من الدماغ، وكان خصهم 40 دقيقة باش يحاكو ثانية وحدة من النشاط العصبي، دراسات أخرى كاتقول باللي محاكاة دماغ كامل خاصو قوة حاسوبية كبر من الحواسيب ديال دابا بـ100 مرة على الأقل.

وزيد عليها أن الدماغ ماشي حاجة ثابتة، حيت الدماغ ديما كيتبدل وكيعاود ينظم الشبكة ديالو حسب المعلومات الجديدة، كيزيد روابط وكيحيد أخرى، وكيبدل فالمواد الكيميائية ديالو بلا ميوقف، حتى العلماء لقاو نوع جديد من المرونة العصبية اللي يقدر يبدل خريطة الدماغ غير من تجربة وحدة. يعني دماغك دابا ما بقاش هو نفس الدماغ مني بديتي تقرا هاد السطور.

وحتى إلا تجاوزنا هاد المشاكل التقنية كاملة، كيبقى سؤال كبير: واش داك الدماغ اللي غادي يتنسخ هو فعلاً “نتا”، ولا غير نسخة منك؟