مصطفى الشاذلي ـ كود//

الوداد قدر يحقق المركز الثاني فأول نسخة ديال السوبر ليغ الإفريقي، نتيجة لا بأس بها لا خدينا بعين الاعتبار الظروف المحيطة بهاد الكأس اللي كتلعب فنطاق زمني ضيق، والعناصر الجديدة اللي التحقت بالوداد واللي خاصها الوقت باش تنسجم مع الفريق.

ولكن فيما يخص النهج التكتيكي د عادل رمزي، فكيطرح بعض الأسئلة، التغيير اللي قام بيه مرغم بغد غياب جبران فالإياب، مكانش فالمستوى المطلوب، وغابت شخصية الوداد، اللي منذ الدقائق الأولى كان باين أنه خارج من المقابلة، وأثر عليه غياب القائد ديالو.

ماشي غير هادشي فقط، ولكن عادل رمزي عجز كليا على قراءة اللقاء ومقدرش يخلق ولو فرصة خطيرة وحدة باستثناء رأسية د العملود، وماشي شي خطورة شكلات.

الوداد عندو فريق متميز، تبنى عبر السنين، وديما كيبقى معادلة ثابتة فالكرة الإفريقية، لكن المدرب الشاب عادل رمزي عندو خدمة كبيرة كتسناه، وخصو يلقى الحلول لهاد المجموعة ويكمل مسار الوداد المتميز فالقارة الإفريقية منذ 2017.