وكالات//

شركة مستحضرات التجميل العالمية e.l.f. Beauty علنات أنها شرات ماركة “رود” ديال العناية بالبشرة والمكياج، اللي كتملكها عارضة الأزياء هايلي بيبر، فصفقة وصلات قيمتها مليار دولار.

وحسب بلاغ رسمي خرج نهار الأربعاء 28 ماي، الصفقة فيها 800 مليون دولار غادي تخلصها الشركة بالنقد والأسهم فاش تكمل الصفقة، وزيد عليها 200 مليون دولار غادي تتعطى من بعد، على حسب النمو اللي غادي تديرو “رود” فالثلاث سنين الجاية.

وبموجب الاتفاق، هايلي غادي تبقى عندها دور كبير فـ”رود”، بحيث غادي تبقى المؤسِّسة والرئيسة الإبداعية، وغادي تترأس قسم الابتكار فالماركة، وتشرف مباشرة على تصميم المنتجات والتسويق، وبالإضافة لهادشي، غادي تكون مستشارة استراتيجية فالمجموعة الجديدة.

وفالبيان ديالها، الشركة قالت بلي “رود” كانت الماركة رقم واحد فمجال العناية بالبشرة من حيث القيمة الإعلامية المكتسبة فـ2024، وحققات نمو كبير وصل 367% مقارنة مع العام اللي فات.

وفالتعليق ديالها على الصفقة، قالت هايلي: “من الأول، كانت الرؤية ديالي هي نقدم منتجات أساسية للعناية بالبشرة ومكياج هايبريد تقدر تستعملها المرأة يوميا. ودابا، من بعد ثلاث سنين فقط، هاد الشراكة فرصة زوينة باش نكبرو ’’رود” عالميا ونوصلو لمزيد من الناس بمنتجات أكثر ابتكارا”.