كود الرباط//

صباح اليوم الخميس 17 أكتوبر الجاري، تنشر فالبوابة الالكترونية للصفقات العمومية بلي الصفقة ديال تهيئة المساحات المخصصة للمعارض لدورة 2025 لمعرض GITEX Africa الذي سيقام في المغرب، بمدينة مراكش، تلغات.

هاد الصفقة لي تلغات كانت ربحاتها شركة TWO WAYS فمنافسة دخلو ليها 5 شركات تقصاو ربعا فالمرحلة الاولى من الصفقة (الظرف الإداري) وبقات غير وحدة.

وحسب مصدر مقرب من الملف ديال الصفقة، فإن إدارة جيتكس كلوبال التابعة لحكومة دبي طلبات بتغيير التصور التقني للمعرض لي غايكون فالمغرب، حيث عاد سالا جيتكس دبي وكاينين تغييرات فهاد المعرض.

وهاد التغيير الجديدة غاتنقص من أمور تقنية وغايتعاود الملف التقني للمعرض وبالتالي صفقة غاتعاود وغايتم الاعلان عليها فالأيام المقبلة.

وأفاد نفس المصدر بلي جيتكس العالم انطلاقا من فعاليات الإمارات الأخيرة، ارتأت تغيير التصور التقني،  غادي يتلانصو مارشي في الايام المقبلة.

وكانت “كود” نشرت صباح اليوم  تفاصيل إضافية تخص صفقة تنظيم “جيتكس 2025” بالمغرب، والتي بلغت قيمتها 12 مليار سنتيم، واللي عليها جدل كبير خصوصا وأن نفس الشركة لي خدات المارشي العام لي فات خداتو هاد العام.

القصة ديال هاد المارشي (لي منشور ف بوابة الصفقات العمومية)، بدات من نهار تحط الاعلان عن الصفقة، للي تقدمو ليها 5 شركات منهم شركات كبيرة ولفات ديما تربح المارشيات الكبار (من المالية للرياضة لغيرها).

المارشي فيه منافسة بين هاد 5 شركات حول خدمات تهيئة المساحات المخصصة للمعارض لدورة 2025 لمعرض GITEX Africa الذي سيقام في المغرب، بمدينة مراكش، بحيث تحدد الموعد النهائي لتقديم العروض  في 11 أكتوبر 2024، الساعة 10:00.

فـ11 أكتوبر 2024، قدمت العروض ديالها، وكيف كيعرف الجميع المتتبع لهادشي ديال الصفقات العمومية، كانت لجنة تقنية مهمتها استقبال ملفات الشركات ودراستها وفق مراحل ومعايير دقيقة.

وحسب مصادر مطلعة على هاد المارشي، كانت اللجنة التقنية المكلفة بدراسة الملفات مكونة من 10 أفراد منهم ممثلي وكالة التنمية الرقمية ADD وممثلي قطاعات وزارية، وللي درست فالمرحلة الأولى الملفات الإدارية لكل شركة.

وكيف ما هو منشور فالبوابة الالكترونية للصفقات العمومية، فراه 4 شركات تقصات فالمرحلة الأولى من مراحل دراسة ومناقشة العروض المقدمة، بسبب عدم إدلاء بالوثائق اللازمة في المرحلة الأولى (مرحلة وضع الظرف الإداري المتعلق بالتعريف بالشركات والتصريح بالشرف والوثائق التعريفية).

موراها كتجي المرحلة الثانية متعلق بوضع الظرف التقني لكل شركة، وهنا طبعا بقات غير شركة وحدة وهي TWO WAYS .