كود الرباط//
البام دار مزيان مع قيادي بارز فالحركة الشعبية، وللي هو ادريس السنتيسي رئيس الفريق الحركة بمجلس النواب (معارضة)، فاش كرا عندو قاعة باش يديرو مجلس وطني للحزب للي حضرو فيه كثر من 600 شخص.
العلاقة بين وزراء البام والحركة الشعبية ماشي مزيانة خصوصا مع وزير التعليم العالي عبد اللطيف ميراوي لي وقف ليهم مارشيات كان طلقهم الوزير السابق سعيد أمزازي، لكن دبا مور هاد صفقة كراء قاعة السنتيسي كولشي ممكن يتبدل.
البام كرا القاعة حسب مصادر “گود” يوم السبت 8 يوليوز الجاري، بمبلغ يفوق 20 مليون سنتيم، فيها وجبة الغداء طبعا، كولشي ديال السنتيسي.
شفنا قبل الحركة الشعبية مكتعطيش انتقادات لوزيرة الأسرة عواطف حيار، يمكن السبب هو أن الوزارة ديال حيار ديما كتكري القاعة عند السنتيسي.
دبا كاينا علاقات غريبة بين وزراء فالحكومة والمعارضة، شي كيكري قاعات من مسؤولي المعارضة عادي والمقابل الصمت وعدم إثارة الخروقات والفضايح لي كيديرو الوزراء، ولا عبر تفويت صفقات لشركات ديال برلمانيين فالمعارضة.
عطيني ونعطيك رجع بقوة فهاد الحكومة، كولشي بان مع صفقات مكاتب الدراسات مع الجهات وكذلك صفقات فشي وزارات ديال وزراء ومقربين منهم.
