أنس العمري -كود///

دارت فالكيبيك بكندا صفقة عقارية كبيرة نجمها كان عثمان بنجلون، أغنى رجل فـ المغرب ورئيس بنك إفريقيا، بعدما باع عقار فاخر كان كيملكو، بمبلغ 14.5 مليون دولار أمريكي تقريبا.

العقار كيتواجد فبلدة لينغويك الصغيرة، قريب من سكوتستاون فمنطقة هوت سان فرانسوا، وعلى بعد ساعة تقريبا من شيربروك، وكيتمد على مساحة كتفوت 500 هكتار.

الصفقة جابت أرباح مهمة لشركة (O Capital Investissement Vert) اللي كتملكها شركة (Global Strategic Holdings Srl) ، ومقرها فلوكسمبورغ، واللي كيرأسها بنجلون نفسو.

هاد العقار كان فالأصل تشراه بنك إفريقيا فـ يناير 2009 من شركة كندية سميتها (Savan Investissement)، وكانت مسيّراها سيدة كندية سميتها جاكلين رافو أوكيلي، بثمن ديال 9.5 مليون دولار فداك الوقت، حسب جريدة (Journal de Montréal).

يعني فهاد البيع الأخير، بنجلون ربح أكثر من 5 ملايين دولار، بحيث الثمن ديال البيع جا تقريبا ضعف التقييم البلدي اللي كان محدد فـ 8.15 مليون دولار. والمشتري خلص ضريبة نقل الملكية اللي وصلات لـ 216 ألف دولار أمريكي لبلدية لينغويك، حسب عقد البيع اللي توقع قدام موثق فـ 29 غشت 2025.

العقار فيه دار كبيرة فخمة بمساحة كتفوت 19 ألف قدم مربعة، فيها طابقين و15 بيت و13 حمام وثلاثة مدافئ حجرية. وزيد عليها أرض شاسعة كتطل على بحيرة موفات، كاينة فيها دار للحراس والخدم وثلاث مباني ملحقة ومستودع خاص بالقوارب.