أنس العمري ـ كود///

المغرب قريب يشري أسلحة مريكانية متطورة من شركة لوكهيد مارتن باش يقوي القدرات ديال سلاح الجو ديالو.

وفي إطار السياسة ديال تحديث الترسانة العسكرية، المغرب حاط فالبال ديالو يدخل مقاتلات الشبح من طراز (F-35).

وحسب موقع أفريكا إنتليجنس، المغرب خدا الموافقات الضرورية من السلطات الأمريكية، فظل القانون المعروف باسم التفوق العسكري النوعي لإسرائيل، اللي كيلزم واشنطن تحافظ على التفوق العسكري ديال إسرائيل فالمنطقة.

المصادر نفسها كتقول باللي المفاوضات وصلات لمرحلة متقدمة، وما كانتش شي اعتراضات من طرف إسرائيل على الصفقة.

دخول مقاتلات (F-35)، للخدمة فالقوات الجوية الملكية غادي يكون قفزة نوعية كبيرة، حيث هاد الطائرات عندها ميزات تكنولوجية عالية، من بينها قدرات التخفي، وأنظمة إلكترونية متطورة، وقدرة كبيرة على التنسيق الفوري مع باقي الوحدات الجوية والبرية.

هاد الطائرات متعددة المهام، وتقدر تدير عمليات المراقبة والتتبع الجوي، وأيضا دعم العمليات البرية بكفاءة كبيرة.

امتلاك المغرب لهاذ التقنية غادي يقدر يبدل موازين القوى فشمال أفريقيا والبحر الأبيض المتوسط، ويدير تأثير واضح فالتوازن العسكري فالمنطقة، وهو ما خلا بزاف ديال الدول والمراقبين الإقليميين والدوليين يتبعو الموضوع باهتمام كبير.