كود الرباط//

واحد الحساب مزيف بان في منصة إكس (X)، وكينتحل اسم وصفة رئيس الحكومة، عزيز أخنوش، وكيحاول يروج لعملة رقمية مغربية مزعومة وعمليات رقمية وهمية. هاد الصفحة دارت روينة البارح ف السوشل ميديا ووسط الفاعلين الماليين.

رئيس الحكومة اكد بلي  هاد الحساب مفبرك وما عندو حتى علاقة لا برئاسة الحكومة ولا بشخص رئيس الحكومة.

والجهة الوحيدة اللي كتنقل أنشطة رئيس الحكومة بشكل رسمي على إكس (X) هي الحساب الرسمي @ChefGov_ma.

وفي نفس السياق، السلطات كتهيب بجميع المواطنات والمواطنين، ومرتادي السوشل ميديا، باش يكونوا حذرين وما يطيحوش في فخ الحسابات الوهمية، ويعتمدوا غير على المصادر الرسمية باش ياخذوا الأخبار الصحيحة.

بعبارة أخرى، أي حاجة كتشوفوها جاية من حساب مشبوه.. تحققوا وماثيقوش.