الرئيسية > آراء > صعيب على واحد فحال مول الفوقية لي مدوز الطفولة ديالو فدار مافيهاش التلفزة وسط عائلة سلفية كاتعتابر التصاور حرام ! اللغة الوحيدة لي كايتقنها هي العربية ! و نهار حن عليه الله و شد الطيارة مشا من الدرارگة ديريكت للسعودية انه يفهم اصلا شنو هوا الاختلاف و الحرية و يعرف بلي المغاربة ماشي مشروط عليهم كلهم يقولو آمين لنفس الافكار !
01/03/2021 14:00 آراء

صعيب على واحد فحال مول الفوقية لي مدوز الطفولة ديالو فدار مافيهاش التلفزة وسط عائلة سلفية كاتعتابر التصاور حرام ! اللغة الوحيدة لي كايتقنها هي العربية ! و نهار حن عليه الله و شد الطيارة مشا من الدرارگة ديريكت للسعودية انه يفهم اصلا شنو هوا الاختلاف و الحرية و يعرف بلي المغاربة ماشي مشروط عليهم كلهم يقولو آمين لنفس الافكار !

صعيب على واحد فحال مول الفوقية لي مدوز الطفولة ديالو فدار مافيهاش التلفزة وسط عائلة سلفية كاتعتابر التصاور حرام ! اللغة الوحيدة لي كايتقنها هي العربية ! و نهار حن عليه الله و شد الطيارة مشا من الدرارگة ديريكت للسعودية انه يفهم اصلا شنو هوا الاختلاف و الحرية و يعرف بلي المغاربة ماشي مشروط عليهم كلهم يقولو آمين لنفس الافكار !

سهام البارودي – كود//

المشكل ديال مول الفوقية و لي كايشبهو ليه انه فاش كايديروها قد راسهم و كايزبلوها و كايعرفو راسهم قودوها مزيان ! كايبقاو يبكيو و يغوتو ” واك واك فيناهي حرية التعبير ديالي” ” راه ماقلت والو واك واك ياك نتوما العلمانيين كادافعو على حرية التعبير علاش مابغيتوش تخليوني نعبر ” و كايتخايلو بلي راه من حقهم يديرو ديك القضية ديال جيب يا فم و گول ! و مافراسهمش بلي حرية التعبير شيء و التحريض و نشر الكراهية شيء آخر مجرم فجميع الدول لي كاتحتارم راسها !

مول الفوقية حط مؤخرا منشور كان باين فيه بلي كايدق فيه على جريدة گود ووصفها بأنها جريدة “ملحدة” و حرض على سقراط و مراتو غيتة بشي هضرة من قبيل ” عقلو على هاد الخونة.. ونهار يجي وقتهم…” و كدا !

علاش باغي تعقل علينا آ سيموحمد ؟! شنو ناوي دير لينا نهار يجي وقتنا ؟ و كيفاش هاد نهار يجي وقتهم ؟! زيد زيد هضر نشوفو كيفاش كاتخايل نتا هاد نهار يجي وقتنا ! واش غاتجلدونا حدا الكرة الارضية فكازا و لا غاترميونا من التوين سانتر و لا عوالين تنفيونا من بلادنا ؟ و لا ياكما كاتخايل راسك رابطني مع شي عود من شعري و داير ديك ” يا خيل الله اركبي” !

انا كانفهم شحال صعيب على واحد ولد التسعينات كبر فدار بين واليدين سلفيين ممنوع من التلفزة و اللغة الوحيدة لي كايتقن هي العربية و نهار حن عليه الله و شد طيارة فين غايمشي ؟ سويد يتمتع بالجمال الرباني ؟ فرانسا يشوف العمران و الحضارة ؟ روما يشم ريحة التاريخ ؟! لا مشا من الدرارگة للسعودية ديريكت ! من الحرنة للحرنة ! صعيب عليه انه يحل عينيه و يعرف معنى الاختلاف و الحرية و صعيب عليه بزاف يآمن بلي المغاربة ماشي شكل واحد و ماشي كتلة وحدة متجانسة ! صعيب عليه يدخل سوق راسو و يتعايش مع فكرة انه ماشي گاع المغاربة مثلا كبرو بلا تلفزة و ماشي گاع المغاربة واليديهم قطعو ليهم تصاور الطفولة حيت كايعتابرو التصاور حرام كيما عاود هوا فواحد المنشور و ماشي گاع المغاربة كايهضرو غي لغة وحدة يتيمة !

المغرب راه بلاد غنية بمختلف التوجهات ! كاين نتا و صحابك ابو الجحيم و امثاله كاينين بزاف ديال المغاربة ماكايعيشوش فحالكم و ماكايآمنوش بداكشي لي كاتآمن بيه ! و من حق الناس يعبرو على آراءهم بلا ماتطلق عليهم سم الظلامية ! لا ! مول الفوقية ماكايدخلش ليه هادشي لراسو ! بغانا كاملين نعيشو نفس الحياة ! عندو واحد الخنشة ديال الافكار المسبقة واجدة و مآمن بلي ديك الافكار هي الحقيقة المطلقة ! گاع العيالات خاصهم يتحجبو و لا يتنقبو باش مايكونش الفتنة ! و العلاقات خارج اطار الزواج كاينتجوا عليهم دراري كايتلاحو فطوارو د الذبل ( الزبل) ! و كلنا مقاطعون ! و كلنا ضد فرانسا !  و الحريات الفردية فسق و فجور ! و لابغينا نتطورو شنو خاصنا نديرو ؟ خاصنا نرجعو للدين ! آبعدا باش كايعجبك مول الفوقية السؤال لي سولتيه ليه و قلتي ليه شنو هوا الحل غايقوليك ” نرجعو للدين” صافي و جمع و طوي و فحال گاع هادوك لي راسهم حابس فالقرن جوج كايشوفو غا اللور و كايبكيو على انقاض الماضي مول الفوقية كايتوحش الاندلس و امجاد الاندلس و كايضل يغوت فالصفحة ديالو “اين الرجال” اكثر من شي بنت باغا تزوج ! و غايصور ليك براد ديال اتاي كايشرشر و غايقوليك الدين ليس هوا الابتعاد عن الحياة ! وا تا فيناهي الحياة آمول الفوقية ؟ راه الحياة ماعندهاش غا داك التصور لي عندك فراسك! غير آجي و دوي على الحياة؟ عشتي شي ؟ سافرتي شي (السعودية مامحسوباش)؟ قريتي شي ؟ كادوي شي لغة تمكنك انك تتواصل مع ناس من ثقافات اخرى؟ تطالع على مراجع و كتب اصلية اخرى ؟! و كايحلف مسيكين و يرد لقلبو ” و الله ان طعم الحرام مر” واش عمرك ذقتي الحرام و لا غا عاودو ليك عليه هههههه ؟! السيد هاز خنشة ديال الافكار المسبقة لي صعيب واحد كابر فمحيط سلفي و عايش فمحيط سلفي و قاري فمحيط سلفي يبدلها و يشكك فيها ولو ثانية وحدة !و نهار زعما خربها هههه مشا مع ليزيلطرا ديال الحسنية و كايتخايل بلي قمة قمم “التاصوبيصيت” هي داكشي لي دار و راه مدوز و عارف و عندو خبرة و هوا عندو القهاوي على عينيك ! راه صعيب بزاف على واحد فحال مول الفوقية يهدم النموذج لي كبر وسط منو و يشكك فيه حيت لاشكك فيه و راب غايهرب ليه فعليا ! السيد يقدر يتسطا!

راه نتا براسك “اقلية” آ سي مول الفوقية ! علاه شحال من مغربي مو دايرة النقاب و كبر فوسط سلفي؟! الف الفين عشرالاف ؟ ماكانظنش انه المنقبات اغلبية فالمغرب ! شحال من مغربي ماتفرجش فالرسوم فصغرو ؟!  شحال من مغربي ماعندوش تصاور الطفولة حيت واليديه قطعوهم حيت كانو مآمنين بأنه التصاور حرام ؟ شحال نتوما من واحد كاتقولو لباكم “ابي؟” الف ؟ الفين ؟ عشرالاف گاع ؟! ماكانظنش انكم اغلبية ! شحال من مغربي ماكايسمعش للشعبي ؟ و الحصباوي و الطقطوقة و الرگبة و الروايس ؟! شحال من مغربي فحالك كايدير الاناشيد فالطوموبيل ؟! راك نتا بركك اقلية ! و المغرب بلاد الاختلاف بغيتي و لا كرهتي ! بلاد البار و الجامع بلاد البيكيني و الجلابة و الصاية و التكشيطة ! وديك الصاية لي كاطنز عليها فاش كتقول ديك ” صايتي حريتي” و نتا كاتهكم على المناضلين و المناضلات الحقوقيين لي كايدافعو على الحريات راه الأميرات كايلبسوها.

و داك النهار لي كاتحلم بيه راه ماعمرو غايكون غي سير دور السكوتش على القراعي د آملو و رتاح مع راسك.

موضوعات أخرى

21/04/2021 02:00

الجديد عند الشينوا.. مع الهوس اللي كاين بالمظهر خرجو تريكو كيبين بنادم مفورمي بعدما الغالبية غلاضو بسباب الحجر الصحي

20/04/2021 22:00

رمضان وكونفينمون (الحلقة 6).. الممثل عبد الصمد الغرفي فحوار مع “كود”: التراويح غير سنة ومافيها باس نبقاو فديورنا.. وكنطالبو الحكومة بفتح المسارح