سهام البارودي – كود//

اي انسان سوي سوا مرا سوا راجل غايكون طلع ليه الخرا و هوا كايشوف حملة التنمر لي تعرضات ليها مؤخرا المؤثرة الشابة صوفيا بربيش و غايكون متأكد انه المغرب كايعاني ماشي من ازمة قيم بل من ازمة انسان. صافي البلاد غرقات وسط جموع ديال بوزبال و سكان القوادس كيما كان كايسميهم موحماد مول الحانوت، ضحايا الهجرة القروية لي شحال هادي ماكنتيش كاتسمع صوتهم و لا صوت واليديهم ولاّ دابا حتى هوما عندها تيليفون و كونيكسيون يقدرو ينغصو بيه حياة اي واحد مختلف عليهم و يتحاماو عليه باش يشوهوه و ينتااقمو منو و شنو الذنب ديال صوفيا ؟
والو، انسانة زوينة و قارية و بنت عائلة و واليديها خاسرين عليها الفلوس و اختارت فحال بزاف ديال بنات جيلها انها تكون حاضرة فالسوشل ميديا صوتا و صورة هادشي غايرجع عليها بحملات ديال التنمر و الحقد المنوي و الطبقي، و خصوصا من نهار تفارقات مع هبات.

المشكل لي وقعات فيه صوفيا بربيش هي أولا مرا، و فالمغرب باش تكوني مرا و تباني فالسوشل ميديا فشي حاجة من غير الطبخ و الروتين اليومي راه خاصك توجدي راسك لقمة قمم التنمر و العنف اللفظي، ايه آ لالة غي مسألة انك مرا باغا تشهري وسط المغاربة راه عولي انك غادي تخلصي عليها من الصحة ديالك النفسية و الجسدية و العائلية….

و لكن الخطأ لي طاحت فيه بربيش انها مرا وولات متاحة لواحد لاسيبل ديال الباشار بوزبالي في طبعه و تفكيره، دابا تخايل معايا عزيزي القارئ كون صوفيا بربيش كانت تصاحبات و تخطبات لطه ايسو و لا مامبا فيت داك الدري ديال ” ماتزابيش” واش كانت غاتكون ضحية هاد التنمر و الحقد المنوي و الطبقي كامل. طبعا لا ؟ كوراها مامعروفاش اصلا، و كوراها معروفة غي عند واحد العينة خاصة ديال المتابعين لي اصلا اصلا داخلين سوق راسهم و كايشوفو طه و مامبا و صحاباتهم و عائلاتهم بعاد عليهم ماشي فحالهم ماكايقدوش ينتاقدوهم اصلا، اقود مايمكن تلقى شي قادوسي كاتبو لمامبا فالتعليقات هو ” نتا آخويا عايش فموروكو و حنا عايشين فالمغرب” و لا ” فيناهي الصلاة شفتك گاعما كاتقول صليتي …” صوفيا ماكانتش غاطيح فحتى شي مشكل كون تزوجات و طلقات بواحد من هادو.

ولكن حيت ختارت العلاقة بهبات تما حلات على راسها الباب ديال قادوس كبير كبير بزاف و مترّع غاتبقى تخلص الثمن ديالو حياتو كاملة حيت اصلا الكائن القادوسي متوفر عندو واحد الخزان ديال طاقة الكبت و الجوع و الحقد لا ينضب ابدا.

كانتمنى انه القانون ياخد حق صوفيا بربيش من هاد حملات التنمر و الحگرة لي كاتعرض ليها، و كانتمنى انه هادشي مايأثرش على الصحة ديالها النفسية و هادشي لي كايوقع لصوفيا راه يستحق شي طلبة ديال علم الاجتماع يديرو عليه دراسة و يخرجو بخلاصات مهمة عن طبيعة المجتمع القادوسي و التأثير ديالو على المجتمع المغربي… و اهم حاجة قبل ماتفكر تولد بنت فهاد البلاد، فكر مزيان فمعامن غاتعيش بنتك.