كود : يونس أفطيط///

المصالح الامنية فمعبر مليلية يوميا كتكشط العشرات من المهربين لي كيجيبو السلعة من الثغر المحتل، وأكثر من هادشي كياكلو الدق وكيموتو فهاد المعابر، يعني الدولة كتحارب التهريب من مليلية، هادشي لي كيبان ولكن الحقيقة الدولة فيها جنب كيكوي وجنب أخور كيبخ.

من بعد قرار السلطات الاسبانية أنها تبقى تسد معبر مليلية فوجه المهربين على الساعة 11 صباحا، يعني ميبقاوش يخرجو السلعة أو يدخلوا من مور هاد الساعة ناض وفد فيه رئيس الامن الاقليمي وباشا بني أنصار ومسؤول الجمارك الاقليمي ومشاو عند الصبليون رغبوهوم باش يزيدو شوية وميسدوش المعبر مع ل11، وهاد الرغيب وصل لنتيجة هي أن المعبر غايبقا يتسد مع 2 دالنهار فوجه المهربين.

دابا غير بغينا نفهموا، يلا كانت السلعة مسموح تدخل وعمل المهربين قانوني علاش كطيروا ليهوم رزقهوم يوميا، ويلا كانت ماشي قانونية علاش ماشيين ترغبوا الصبليون يزيدو شوية دالساعات للمهربين؟!.