كود – وكالات//

الرئيس الفنزويلي نيكولاس مادورو قال إن عند بلادو 5 آلاف صاروخ مضاد للطائرات روسي الصنع باش يواجه أي تهديد من أمريكا، خصوصًا مع وجود القوات الأمريكية فالبحر الكاريبي.

فحفل حضرو فيه كبار القادة العسكريين، مادورو قال إن الصواريخ من نوع “إيغلا-إس” وموزعة فمواقع الدفاع الجوي باش “يضمنو السلام”. هاد الصواريخ مصممة باش طيًح الطيارات اللي كيطيرو هابطين، واستعملوها فتمارين عسكرية ردًا على النشاط العسكري الأمريكي.

هاد التصريح جا بعدما أمريكا فسبتمبر دارت هجمات على قوارب قرب السواحل الفنزويلية وقالو إنها كتستعمل فالتهريب ديال المخدرات. فنزويلا نددات بهاد التحركات واعتبراتها بروفة للإطاحة بمادورو، خصوصًا وأن الجيش الأمريكي متواجد بشكل كبير فالبحر الكاريبي هاد الفترة.

مادورو أكد كذلك أنه غادي يواصل تعزيز القدرات العسكرية ديال بلادو، وقال باللي الهدف ماشي الحرب ولكن باش “أي واحد يقدر يهدد فنزويلا يعرف القوة اللي عندنا”. هاد التصريحات جاو وسط توترات متزايدة بين واشنطن وكراكاس، واللي خلات بزاف من دول أمريكا اللاتينية يقلقو من احتمال تصاعد الأزمة.