وكالات//

أكدو البوليس ديال ألمانيا وفاة نجم اليوتيوب المعروف جان زيمرمان، اللي كيتعرف بلقب “عاصفة فالرّاس ” (Gewitter im Kopf)، من بعد ما لقاو الجثة ديالو فواحد الشقة فمدينة كونيجسفينتر جنوب بون، نهار 18 نونبر اللي، وكان عندو 27 عام.

زيمرمان كان واحد من أشهر وجوه الإنترنت ف ألمانيا، القناة ديالو فيها أكثر من جوج مليون ديال المتابعين، واشتهر بمحتوى صريح وإنساني كيوثّق فيه يومياتو وهو كيتعايش مع متلازمة توريت، وهي اضطراب عصبي كيدير حركات وأصوات لا إرادية، اللي ممكن حتى يخرج فيها كلام خايب بلا ما يكون قاصد.

وأكدو البوليس أنه دابا ما كاين حتى شي دليل كيبان أن الوفاة فيها شبهة جنائية، وباقي الرأي العام كيتسنى تقرير الطب الشرعي باش يوضح شنو وقع بالضبط، خصوصاً مع التساؤلات اللي طلعات حول واش الحالة الصحية ديالو كان ممكن تكون عندها علاقة بالوفاة.

وكان زيمرمان داز فآخر 2022 من عملية زرع جهاز ديال التحفيز العصبي فالمخ باش يخفف من حدّة التشنجات، ولكن المتلازمة بقات مأثرة على الحياة اليومية ديالو. المتابعين ديالو عبّرو على التعاطف الكبير معاه، وأشادوا بالشجاعة ديالو فأنه يبيّن التحديات النفسية والعصبية بطريقة توعوية وإنسانية.