عثمان الشرقي – كود //

بعد مسيرة فنية عامرة بالنجاحات والتميز، خرجات الفنانة والراقصة إيناس بتصريح جديد شعل الساحة الفنية، كتعلن فيه اعتزالها للعالم الفني ، وفتح صفحة جديدة فحياتها العاطفية بعيدا عن الأضواء والشهرة.

الجمهور لي كان ديما متعود على ستيل إيناس المتميز  فالشطيح بالنقطة والفاصيلة و لي كان كتعطي فيه لكل حركة حقها، لدرجة المتابعين كيستغربو على الطريقة اللي كتخلي بها اي واحد توقف قدامو يخرج الفلوس من الجيب بلا مايشعر ، هاد الموهبة لي عندها فتحريك العجلة الاقتصادية خلالها من الرواد و كتأكد  أنها شخصية فنية غيخلي اعتزالها فراغ مهم فالساحة .

واحد  من المعجبين ديالها صرح بعدما سمع خبر الاعتزال : “أنا بعدا غا نوحل غا مع الواليد، فين ما كندخل لدار كيقولي دير لينا إيناس ،هاد الجملة كتبين الشعبية الكبيرة ديالها وتأتيرها على محبيها بمختلف الأعمار ، ” المختار “ من مدينة السطات قال أنه  كيسافر  ويديبلاصا كل  ويكاند عبر ربوع المملكة  باش يشوف إيناس مباشرة ، سوا مع ولد مبارك الخرىيبݣي ،او عبدو جغالف او الفنانين الاخرين لي كانت معهم ، الشيء لي كيعكس حجم الحضور الجماهيري ديالها .

فتصريح آخر، صرحات إيناس بأنها غادي تبقا ديما مبلية بالشطيح  ولكن فقط و حصريا لراجلها الجديد، وغاتركز على تجربة  الحياة الزوجية ،هاد القرار حسب مصادر مقربة منها، كيعكس رغبتها فحياة مستقرة وعيش التجربة العاطفية بعيداً عن ضغوط الشهرة، وكيخلي التساؤلات مفتوحة: واش غادي ترجع للفن فمرحلة لاحقة؟ ولا هاد الخطوة هي نقطة التحول النهائي فالحياة ديالها؟