كود الرباط//
علمت “كود” من مصدر مطلع أن منصب رئيس لجنة العدل والتشريع بمجلس النواب، دار صداع كبير وسط الحركة الشعبية، تزامنا مع الدخول السياسي والتشريعي، بحيث سال هاد الصداع بتكليف الأمين العام امحند العنصر من طرف المكتب السياسي باش يختار المرشح لهاد المنصب.
وحسب مصدر “كود” هاد التخريجة جات فاجتماع المكتب السياسي مساء الجمعة الماضي، بين الأمين العام العنصر ورئيس المجلس الوطني للحزب مع الفريق الحركي بمجلس النواب.
وكشف ذات المصدر بلي كانو 6 مرشحين فالأول من بعد ولاو 3 بعدما انسحبو ثلاثة النواب من المنافسة. منهم عبد النبي العيدودي المدان فجرائم الأموال بحكم ديال الاستئناف،
المرشحين لي بقاو، وفق مصدر “كود”، هوما عادل السباعي، ومحمد فضيلي لي استرجع مقعدو البرلماني فالانتخابات الجزئية، محمد مبدع الوزير السابق ورئيس الفريق النيابي سابقا.
مصدر داخل المكتب السياسي للحركة الشعبية، قال لـ”كود” بلي ترشيح مبدع مستبعد نظرا للقضية لي عندو فالمحكمة، وكذلك رغبة الحزب فعدم إحراجه إعلاميا.
مبدع بغا المنصب وكان دار لقاءات مع برلمانيين وعيط ليهم لدارو. ولكن الكلمة الأخيرة عند العنصر. ولي ختارو غاياخد به الفريق بلا تصويت.
مصدر “كود” قال بلي العنصر غادي يعطي المقترح ديالو اليوم فالعشية.
