عفراء علوي محمدي- كود//

كليب منال بنشليخة الجديد “نية”، بقدر ما لقى نجاح وتعرف دغيا، بقدر ما واجه مجموعة من الانتقادات، بحيث نشطاء كثار على مواقع التواصل الاجتماعي شافو انه كيهين المرأة وكيسلعها، بحكم أنه عطى قيمة لدم العذرية فالزواج، ونتقص من المرا اللي عندها علاقات قبل العرس.

الفيديو كليب صور لقطة ديال الدم فيزار بيض، واللي كيعني دم العذرية، بحكم انه مقرون بتيمة “العرس” و”الزواج” اللي كيتكلم عليه الفيديو كليب، الشي اللي اعتبرو نشطاء كثار تكريس للنظرة المجتمعية للعروسة، اللي خاصها تكون عزبة ضروري، وتكون بميكتها، بحال شي سلعة، وخاص راجلها يكون اول واحد كيحيد ليها هذ الميكة، وتكون ديالو بوحدو.

كذلك، فالكلمات ديال الأغنية، كاين إشارة لأهمية أن البنت ماتعرف حتى شي واحد قبل الزواج، فاش قالت منال “آجي لدارنا”، وهذا كيعني، حسب هؤلاء المعلقين، أن البنت اللي كتعرف دراري قبل الزواج مامزياناش، حيت خاص يكون عينيها ف”الحلال”.

لكن فالمقابل، الكلمات نفسهم فيهم العكس ديال هذشي اللي فهموه البعض، بحيث كتقول منال فالبدية “ماشي عاد غانبدا.. عرفت شحال من واحد.. بغيتي نكون ليك غير أنت خليك كتحلم”… وكتقول كذلك “غير الوقت اللي ضايع ليا سحاب ليك باقة نية” بمعنى انها ديجا فعلاقة مع شخص قبل الزواج.، وهذشي لاحظة البعض وقال انه كاين مفارقة كبيرة وتناقض فليبارول.

“كود” حاولات تتواصل مع منال بدون جدوى، من بعد قدرات تتكلم مع المانادجر ديالها والزوج ديالها، منصف، اللي عبر على استغرابو الكبير من ردود الأفعال على الفيديو كليب، واللي يمكن يتفهم منو أن الفنانة مقصداتش هذشي اللي اولو الناس.

وفتصريح مقتضب ل”كود”، قال المندجر: “يمكن ترجعو لفيديو كانت حطاتو فأستكَرام على موضوع الكليب، باش تفهموه مزيان علاش كيتكلم”.

وفالفيديو اللي كان سبق لاحت منال، قالت ان الموضوع كيهضر على شيخة، اللي حياتها كلها صخب ومغامرات، لكنها فنفس الوقت إنسانة عادية بحال جمبع النساء، وكانت على علاقة مع شخص، وكلباتو باش يجي لدارهم، لكن هو عمرو ما جا، وبقات كتحلم بالعرس اللي عمرو مادار..

لكن هذ الفيديو كيبقى غير واضح ومافيهش علاش بالضبط تختار ديكور دم العذرية، وواش كانت الغاية منو تعزيز هذ التقليد اللي كيحتقر المرأة ويشيأها، او أن هذ المنظر كانت فيه جمالية وبغات منال توظفو فالعمل ديالهابدون خلفيات.. دابا الصداع نايض.. والصور النمكية على المراة ببحال هذ الامور كتزيد تتعزز وتترسخ فالعقول، وخصوصا عند البنات اللي ماعارفينش حقوقهم ومواخديتش حريتهم الكاملة فمجتمع ذكوري كيحتقرهم، وبالتالي واخا يكون القصد ديال منال مغاير، التوضيح فهذ المواقف لا بد منو.

https://www.instagram.com/tv/CG-RDSDjjKW/?utm_source=ig_web_copy_link