عمر المزين – كود///

تمكنات عناصر الشرطة بولاية أمن فاس، فالساعات الأولى من صباح اليوم الثلاثاء 13 يناير الجاري، من توقيف جوج اشخاص كيتراوحو فالعمر ديالهم بين 23 و27 عام، وذلك للاشتباه فـتورطهم فـالسرقة الموصوفة وارتكاب حادثة سير مع جنحة الفرار.

وحسب المعطيات المتوفرة، فالمشتبه فيهم عرّضو سيدة للسرقة بالخطف باستعمال دراجة نارية فحي من أحياء مدينة فاس، قبل ما يرتكبو حادثة سير مع سيارة ويفرّو من عين المكان، وهي الأفعال الإجرامية اللي كانت موضوع شريط فيديو تدار على صفحات مواقع التواصل الاجتماعي.

وقد مكنت الأبحاث والتحريات اللي دارت فهاد القضية من تشخيص هوية المشتبه فيهم، ومن بعد تم توقيفهم، حيث بيّن التنقيط فقاعدة معطيات الأمن الوطني أن واحد منهم مبحوث عليه قضائياً للاشتباه فـتورطو فقضية أخرى متعلقة بالضرب والجرح باستعمال السلاح الأبيض.

وتم إخضاع المشتبه فيهم لتدبير الحراسة النظرية، رهن إشارة البحث القضائي اللي كيجري تحت إشراف النيابة العامة المختصة، وذلك باش يتم الكشف على جميع الظروف والملابسات والخلفيات ديال هاد القضية، وكذا تحديد كافة الأفعال الإجرامية المنسوبة للمعنيين بالأمر.