أنس العمري – كود///

فالوقت لي الاتحاد الدولي لكرة القدم منح المغرب استضافة حدث عالمي كبير، وهو المونديال في دورة 2030، باقين كنشوفو شي تصرفات ما مفهموش الرسائل منها ولا الغرض من الإقدام عليها فهاد التوقيت.

ومن ضمن هاد التصرفات السلوك لي يمكن نوصفوه بـ “المافيوزي” لأصحاب الطاكسيات، لي من إطلاق “شرع اليد” فالشوارع لفرض التراجع عن تطبيقات النقل الذكية انتلقوا دابا إلى محاولة لويان يد مؤسسات الدولة.

وهادشي كيعكسو الإنزال لي علنوا على أنهم باغيين يديروه فكازا، حيث حددت مختلف الهيئات الممثلة للقطاع، اليوم الخميس، كموعد لتنظيم وقفة احتجاجية، أمام محكمة الاستئناف بالدار البيضاء.

وهي الوقفة لي منع عامل مقاطعات عين السبع الحي المحمدي، محمد الطاوس، تنظيمها.

وقد عهد بتنفيذ هذا القرار العاملي إلى القوات العمومية من أمن وطني، وقوات مساعدة، وإلى السلطات المحلية المختصة.

الكرة دابا عند أصحاب الطاكسيات وخطوتهم الجاية غتبين الكثير بخصوص تصرفاتهم، إذ أنهم إلى ما متاتلوش للقرار العاملي وداروا الوقفة، فهذا رسالو واضحة وتصعيد خطير خاص يتم التعاطي معه بحزم.