كريم الصوفي – كود//
[email protected]

قالت تقارير إخبارية، أن “لاگوارديا سيبيل”  فككو، مؤخرا، ريزو إجرامي كبير كيضم 7 ديال الأشخاص كيحملو الجنسية الإسبانية والمغربية وكلهم في السن القانونية (5 رجال و2 عيالات) تم استخدامهم كواجهة في غسيل الأموال المتحصلة من تهريب الكوكايين من مليلية لشبه الجزيرة الإيبيرية و الاتجار فيها.

وأضافت التقارير ذاتها، أن التحقيقات ف هاذ الشبكة الإجرامية بدات ف نونبر 2021، وتم الكشف عن ريزو متخصص ف تهريب الكوكايين النقي ف الشاصيات ديال الطوموبيلات السياحية، حيث تم تحديد هوية متهمين عندهم سجلات إجرامية، ومن بعد تم الخطيط لعملية “سارمينتو” اللي طيحات ريزو والعناصر ديالو والمخابىء ديال الكوكايين داخل المدينة.

وحسب وثائق البحث والتحقيق، هاذ الريزو روج تقريبا 3.5 طن كوكايين مع نسبة نقاء 92 في المائة. وتم عقل الممتلكات المنقولة وغير المنقولة المكونة من 7 ديال الديور و 3 ديال الگراجات و 28 طوموبيل و 23 حساب بنكي وودائع مصرفية بقيمة 2 مليون أورو. بالإضافة إلى تيلفونات متطورة وأجهزة إلكترونية..

https://melillahoy.es/la-guardia-civil-asesta-el-mayor-golpe-al-trafico-de-cocaina-en-melilla