كود – كازا ///

نشرات الجريدة الرسمية الإسبانية، مؤخرا، تفاصيل القرار الصادر عن مجلس الوزراء برئاسة بيدرو سانشيث، والمتعلق بالموافقة على الاعتراف بالبيرمي المغربي ديال الشوافرية البروفيسيونيل، حسب ما نشرات مواقع إلكترونية ف الجارة الشمالية.

وحسب المصادر ذاتها، تم إلزام الشوافرية البروفيسيونيل المغاربة غير باختبار تطبيقي على الطرقات العامة، ف بلاصة ما كان معمول بيه سابقا من اختبارات نظرية وتطبيقية. وف 12 فبراير الفايت، عطا مجلس الوزراء الإسباني الضوء الأخضر لتعديل اتفاقية الاعتراف المتبادل بالبيرميات ديال السوگان.

الهدف من هاذ التعديل هو تبسيط المساطر قدام الشوافرية البروفيسيونيل المغاربة اللي عليهم الطلب من الشركات الإسبانية اللي كتعاني من عجز كبير ف هاذ الفئة ديال العمال المهنيين واللي كيوصل إلى 20 ألف شيفور بروفيسيونيل ف نقل البضائع والركاب.

وغاد يتم تطبيق هاذ الاتفاقية مؤقتا بعد ثلاثين يوما من تاريخ استلام المذكرة الشفوية من السفارة المغربية، وستدخل حيز التنفيذ من تاريخ استلام آخر إخطار يبلغ بموجبه الطرفان بدخول الاتفاقية حيز التنفيذ.