گود سبور//

برا الدولي المغربي إسماعيل الصايباري من الاصابة اللي كانت جاتو مع المنتخب الوطني المغربي فمونديال 2026، وقدر يتريني بشكل عادي مع الفريق ديالو الجديد بايرن ميونخ الالماني.

وتدرب اسماعيل الصايباري اليوم الاثنين مع بايرن ميونخ، وترينا مع الگروب واللعابا ديال فرقتو الجديدة لاول مرة ملي سنا معهم فيونيو اللي فات، حيث كانو مشاو دارو جولة فآسيا وخلاوه فميونخ كايتعالج من الاصابة وكاتيري بوحدو وكايدير تمارين انفرادية.

ومعولين بايرن ميونخ على اسماعيل الصايباري باش يعزز الهجوم ديالهم خلال الموسم الجاي، مع العلم ان صاحبو النگليزي هاري كين مهاجم البايرن ربح غير اليوم الاثنين الصباط الذهبي الاوروبي لأحسن هداف فأوروبا فموسم 2025-2026، وهذا الشي كايبين ان المنافسة غاتكون قوية فهجوم البايرن الموسم الجاي.