كود الرباط//

بداية قوية سجلاتها صادرات الصناعة التقليدية المغربية فـ2025، بحيث عرفات نمو بـ27% فيناير وفبراير، وقيمتها فاتت 231 مليون درهم، حسب  بلاغ رسمي من كتابة الدولة المكلفة بالصناعة التقليدية. شهر يناير بوحدو سجل طفرة بـ31% مقارنة مع نفس الشهر فـ2024.

الفخار كان هو نجم الصادرات، واحتل المرتبة الأولى بين المنتجات المصدّرة بنسبة 32%. ومن وراه، جا اللباس التقليدي اللي دار قفزة خيالية بنسبة نمو وصلات لـ133%، وخدا 25% من المجموع. الزرابي، اللي كانت ديما حاضرة، تراجعات للمركز الثالث بنسبة 16%.

من ناحية البلدان اللي كتستهلك الصناعة التقليدية ديالنا، أمريكا باقة فالمقدمة بـ40% من الصادرات، وتركيا دارت المفاجأة وقفزات للمركز الثاني بعد ما تضاعف الطلب عندها بـ144 مرة وفرنسا جات فالمرتبة الثالثة بحصة 10%.

أما على مستوى المدن، فكازا رجعات تتربع على العرش كمركز أول للتصدير، بحصة 42% من مجموع الصادرات، وذاك بعدما كانت مراكش هي الأولى فـ2024. هادي تراجعات للمركز الثاني بـ37%، وفاس باقية فالبوديوم فـالمركز الثالث بـ13%.

الصناعة التقليدية المغربية باقة كتقنع وتغزو العالم، وهاد البداية كتوحي بسنة واعدة للصناع والحرفيين ديال البلاد. وطبعا مع المونديال غاتزيد تنتعش كثر، خصوصا وأن إنجاز المغرب فمونديال قطر ساهم ف تزايد السياح للمملكة وبالتالي في انتعاش الصناعة التقليدية.